Уул уурхай хүнд үйлдвэрийн сайд Г.Ёндон хэд хоногийн өмнө "Манай улс шатахууны хомсдолд орсон. Энэ асуудлыг шийдэхээр шуурхай ажиллаж байгаа" гэдгээ мэдэгдсэн.

Товчхондоо бол "Хойд хөрш гэрээгээ биелүүлээгүй. Тэд буруутай. Аравдугаар сарын нэгэн хүртэл ОХУ-аас шатахуун орж ирэх боломжгүй. Тиймээс урд хөршөөс бадар гуйсан. Энэ л ганц арга. Боломж" хэмээж байсан билээ. Гэтэл салбарын сайдын эл үгний чимээ намжиж амжаагүй байтал Шатахуун импортлогч компаний удирдлага экспортлогч тал болох ОХУ-ын Роснефть компанийн төлөөлөлтэй уулзаж, асуудлыг шийдчихэв.

Тодотговол, Петровис ойл ХХК-ийн ерөнхий захирал О.Содбилэг өчигдөр энэ талаар "Роснефть компанитай уулзаж байна. Есдүгээр сард 1500 тонн АИ 92 бензин, аравдугаар сард 44 мянган тонн АИ 92 бензин, есдүгээр сард ачигдаагүй байсан 10 мянган тонн АИ 92 бензин авахаар боллоо" гэдгээ цахим хуудсаараа дамжуулан мэдээлэв.

Улс орноороо шатахууны хомсдол орж, дараалал үүсгэж, өндрийг аваад байсан асуудлыг салбарын сайд нь бус шатахуун импортлогч компанийн удирлага ийм хурдан, шуурхай шийдэчихлээ. Энэ нь манай улсын Засгийн газар зүгээр нэг аж ахуйн нэгжээсээ дор эрх мэдэл, нэр хүндтэй байгаагийн тод жишээ болов. 

Монгол Улсын Засгийн газар өчигдөр ээлжит бус хуралдаан зарлаж, шатахууны хомсдлыг шийдэх талаар хэлэлцэнэ хэмээж байсан ч тодорхойгүй шалтгаанаар хурлыг цуцалсан билээ. Тэгвэл эх сурвалжийн мэдээлж буйгаар Засгийн газрыг шатахууны асуудлыг хуралдаж шийдэх гэсээр байтал шатахуун импортлогч компани нь асуудлыг аль эрт шийдэж, бүүр ард түмэнд мэдээлчихсэн тул дээрх хурлыг цуцалсан гэх. 

Ямартай ч дээрх үйл явдал нь Засгийн газар тэр дундаа Уул уурхайн сайд Г.Ёндон энэ салбарт үнэндээ "жижигдэж" байгааг ард түмэнд харууллаа.

Б.Баатар