Сүүлийн үед шатахууны асуудал олон хүний толгойны өвчин болоод байна. Шатахууны үнэ үе, үе нэмэгдэж, иргэдийг бухимдуулдаг байсан бол өдгөө хомсдол үүсэж, асуудал дагуулав.

Гэхдээ хонгилыг үзүүрт гэрэл асаж, ОХУ-аас шатахуун ирэхээр болоод буй. Ямартай ч монголчууд шатахуунтайгаа золгох нь. Харин үнэ нэмэгдэх эсэх нь одоогоор тодорхойгүй байна. Үүнд анхаарал хандуулах учиртай. 

Хэдхэн хоногийн өмнө Уул уурхай, хүнд үйлдвэрийн яам, Ашигт малтмал, газрын тосны газар болон шатахуун импортлогч аж ахуйн нэгжүүд хамтран мэдээлэл хийсэн. Энэ үеэр "Петростар" ХХК-ийн Гүйцэтгэх захирал Б.Байгалтуяа "Петровис компани АИ-92 бензинийг 2050 төгрөгөөр борлуулж байна. Өртгөөсөө 123 төгрөгийн алдагдалтай үнээр борлуулж байгаа гэсэн үг.

Өнөөдрийг хүртэл зөвхөн АИ-92 бензинтэй холбоотойгоор 28 тэрбум төгрөгийн алдагдалд орсон. Зах зээлийн хуулиараа явбал АИ-92 2200 төгрөг дээр очих ёстой.

Засгийн газраас КОВИД-19-ийн нөхцөл байдлаас шалтгаалж, нийгмийн хариуцлагын хүрээнд үнээ барь гэж байгаа. Түүний дагуу үнээ барьж байна" гэдгийг онцолсон.  

Энэхүү мэдээллээс үзэхэд хомсдоод буй шатахуун эргэн ирэхдээ үнэ нь өсөхгүй гэх баталгаа алга.

"Газрын тосны бүтээгдэхүүний хангамж, үнийг тогтворжуулах асуудлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн байгууллагуудын хамтарсан зөвлөл” гэж бий. Энэхүү зөвлөлийг Уул уурхай, хүнд үйлдвэрийн дэд сайд О.Батнайрамдал ахалдаг. Тэрбээр уг зөвлөлийг толгойлоод нэг жил гаруй болж байна. Гэтэл энэ хугацаанд зөвлөлийг нэг ч удаа хуралдуулаагүй аж. 

Түүнийг ийнхүү назгайрч суух хооронд шатахууны үнэ хэд, хэдэн удаа нэмэгдэв. Цаашид ч нэмэгдэх хандлагатай байгаа нь нууц биш. 

Ард түмний нуруун дээр ачаа болдог шатахнууны үнэд анхаарал хандуулахгүй бол үнийн зөвлөлийн ч, дэд сайд О.Батнайрамдал ч шаардлага алга. Энэ мэтээр сэтэр зүүж, ажил хийдэггүй хүмүүст хариуцлага тооцох шаардлагатай байна Ерөнхий сайд аа.

Б.Баатар