Улаанбаатар хотод шатахууны хомсдол үүсээд хэд хоног болж байна. Үүнтэй холбоотойгоор Хотын дарга Д.Сумъяабазар байр сууриа илэрхийллээ.

Тэрбээр “Шатахууны хомсдол иргэдийг бухимдалд хүргэлээ. Энэ бол зүй ёсны хэрэг. Өмнө нь Уул уурхайн сайд байсан хүний хувьд шатахууны нөөцийг ийм хэмжээнд хүргэнэ гэдэг бол дэндүү дордсоны шинж гэж харж байна. Үүнийг зохицуулах нь тийм хэцүү зүйл огтоос биш.

“Эрдэс Ойл” компанийг байгуулж, шатахууны үнийг тогтворжуулах бодлого гаргасны үр дүнд 52 тэрбум төгрөгийг ард иргэдийн халаасанд үлдээж өгсөн. Үнэ цаашид ч тогтвортой байх бүрэн боломж байсан. Харамсалтай нь төрийн бодлого, үйл ажиллагааг цааш нь үргэлжлүүлж чадаагүйн улмаас үнийн асуудалд цэвэр бодлогын алдаа гарсан. Үүнээс үүдээд хангамжийн асуудалд ч цэвэр бодлогын алдаа гарсан.

Үнийн хамгаалалтын гэрээг үргэлжлүүлсэн бол өнөөдөр АИ92 шатахууны үнийг 1550-1600 төгрөгийн хооронд барих бүрэн боломжтой байсан. Үүнтэй уялдуулан шатахууны хангамжийг тогтвортой барих бүрэн бололцоотой байсан. Төрийн залгамж чанарыг ойлгоогүй хүмүүсийг гайхаж байна. Ер нь зөв зүйлийг цааш нь үргэжлүүлэх ёстой. "Найрсаг Улаанбаатар”-ыг үргэлжлүүлэх нь зөв. Энд Э.Бат-Үүл нь байна уу, хэн нь байна уу хамаагүй. Шатахууны нөөц байгаа. 17 мянган тонн буюу хагас сарын хугацаатай шатахууны нөөц хангалттай байгаа. Томоохон ААН-үүд хэт их хаширлаж, зориуд барьсан гэж харж байгаа. Үүнийгээ болих хэрэгтэй. “Эрдэс Ойл” компанид миний хувийн оролцоо огт байхгүй гэдгийг хатуу мэдэгдэж байна " гэв.

Б.Баатар