Энэ долоо хоногт улс төр, нийгэм, спорт, эдийн засгийн салбарт өрнөсөн үйл явдлыг "Багц 24" буландаа онцолж байна.

Шатахуун хосдож, өндрийг авав

Энэ долоо хоногт анхаарал татсан гол сэдэв нь шатахуун хомсдол байв. Уул уурхай хүнд үйлдвэрийн сайд Г.Ёндон "Манай улс шатахууны хомсдолд орсон. Энэ асуудлыг шийдэхээр шуурхай ажиллаж байгаа" гэдгээ мэдэгдсэнээр иргэд шатахуун түгээгүүрийн газар урт дараалал үүсгэж, хомдол жинхэнэ утгаараа нүүрлэв. 

Салбарын сайд нь аравдугаар сарын нэгэн хүртэл ОХУ-аас шатахуун ирэхгүй, тиймээс урд хөршөөс шатахуун оруулж ирэх талаар ярилцаж байгаа гэдгийг онцолж байсан. Азаар шатахуун импортлогч компаний удирдлага экспортлогч тал болох ОХУ-ын Роснефть компанийн төлөөлөлтэй уулзаж, асуудлыг шийдэж, энэ сардаа багтаж, 1500 тонн АИ 92 бензин, аравдугаар сард 44 мянган тонн АИ 92 бензин, есдүгээр сард ачигдаагүй байсан 10 мянган тонн АИ 92 бензиныг хойд хөршөөс авахаар болов.

Ардчилсан нам аравдугаар сарын 1-нд “Одоо боллоо” уриантай эсэргүүцлийн жагсаал хийхээ мэдэгдэв

УИХ дахь АН-ын бүлэг мэдээлэл хийж, УИХ-ын ээлжит бус чуулганыг яаралтай хуралдуулахыг шаардав. Учир нь Монгол Улсын нийгэм- эдийн засаг, эрүүл мэндийн байдал хүндэрч байна. Нефтийн бүтээгдэхүүний хомсдол үүсээд удаж байхад Засгийн газар яаралтай хариу арга хэмжээ авсангүй.

Нүүрсний экспорт зогсож, АИ-92 шатахуун тасарч байхад эсрэг арга хэмжээ авч, хоёр хөрштэй асуудлыг ярилцаж эртнээс зохицуулаагүй цаг алдсан МАН-ын Засгийн газар хариуцлага хүлээх хэрэгтэй. УИХ-ын ээлжит бус чуулганыг яаралтай хуралдуулж, асуудлыг шийдэх ёстой гэсэн юм.

мөн коронавирусний халдвар нэмэгдэж байхад Засгийн газар өөрөө гудамжинд шоу хийж, Коронавирусний халдварын үед Ковид-ийн эсрэг хуулийг баримтлан бүх эрх мэдлийг гартаа авсан ч МАН-ын Засгийн газар ажлаа хийсэнгүй. Тиймээс хариуцлага тооцох ёстой болж байна. Аравдугаар сарын 1-нд “Одоо боллоо” гэдэг уриан дор эсэргүүцэл өрнүүлж, жагсаал хийнэ гэдгээ мэдэгдэв.

Монгол Улсын Ерөнхийлөгчийн 2021 оны ээлжит сонгуульд оролцсон нам, эвслийн сонгуулийн зардлын тайлан ил болов

Монгол Улсын Ерөнхийлөгчийн 2021 оны ээлжит сонгуульд оролцсон нам, эвслийн сонгуулийн зардлын тайланг Үндэсний аудитын газар аудит хийж, тайланг нээлттэй мэдээлэв.

Монгол Улсын Ерөнхийлөгчийн сонгуульд нэр дэвшигчдээс сонгуулийн зардлын тайлангаа ирүүлсэн 3 нэр дэвшигчдийн дансанд нийт 6 тэрбум 407 сая 100 мянган төгрөгийн орлого төвлөрчээ. Сонгуулийн үйл ажиллагааны зардалд 6 тэрбус 690 сая 300 мянган төгрөг зарцуулсан байна. Харин харилцах дансанд 229 мянга 600 төгрөгийн үлдэгдэлтэй үлджээ. Түүнчлэн 283 сая 400 мянган төгрөгийн төлөгдөөгүй өр төлбөр тайлагнасан байна.

Нэр дэвшигчдэд өгсөн хандаивын нэгдсэн мэдээллээс харахад МАН-д хамгийн олон буюу 3329  хүн 4 тэрбум 772 сая 640 мянга 200 төгрөгийн хандив өгсөн байна. Зөв хүн электорат эвсэлд 1999 хүн, байгууллага 1 тэрбум 175 сая 316 мянган төгрөг, Ардчилсан намд 104 иргэн, байгууллага 459 сая 192 мянга төгрөгийн хандив өгчээ. Нэр дэвшигчдээс Зөв хүн электорат эвсэлээс нэр дэвшигч Д.Энхбат 200 сая төгрөгийг өөрийн хөрөнгөөс гаргасан байна. Харин МАН, АН-аас нэр дэвшигчид өөрийн хөрөнгөөс гаргаагүй хэмээн тайландаа мэдүүлжээ.

Цэцийн гишүүнд нэрийг нь дэвшүүлэхээр болсон Д.Гангабаатар гэж хэн бэ

Үндсэн хуулийн Цэцийн хоёр гишүүний бүрэн эрхийн хугацаа хоёр жилийн өмнө дууссан ч нөхөн томилгоог хийж чадаагүй өдийг хүрээд байсан. Тэгвэл Цэцийн гишүүнд нэр дэвшигчийн нэр энэ долоо хоногт тодров.

Тодруулбал, Улсын дээд шүүхийн нийт шүүгчийн хуралдаан өчигдөр буюу есдүгээр сарын 20-ны өдөр болж, хуралдаанаас олонхын санал авсан Дашбалбарын Гангабаатарыг Үндсэн хуулийн цэцийн гишүүнд нэрийг нь дэвшүүлж, Монгол Улсын Их Хуралд санал болгохоор тогтжээ.

Д.Гангабаатар нь гадаад хэлний дээд сургуулийг орчуулагч, МУИС-ийн Хууль зүйн сургуулийг эрх зүйч мэргэжлээр тус тус төгссөн. Япон улсын Нагояагийн их сургуулийн Хуулийн сургуульд хууль зүйн магистр, хууль зүйн ухааны докторын зэрэг хамгаалсан гадаадын таван хэлтэй нэгэн юм. 

Тэрбээр МУИС-ийн Хууль зүйн сургуульд захирлын туслах, багш, дэд профессор, эрдэмтэн нарийн бичгийн дарга, профессор, Нидерланд улсын Утрехтын их сургуулийн хуулийн сургуульд зочин судлаач, Их Британи улсын Queen’s University of Belfast зочин судлаач, АНУ-ын Жон Маршаллын хуулийн сургуульд зочин судлаач, Япон улсын Нагояагийн их сургуульд профессороор ажилласан байжээ.