Монгол Улс ямартай ч шатахуунтайгаа "золголоо". Хэд хоног ард түмнийг бухимдуулж, шатахуун дээр "алалцуулсаны" эцэст ийнхүү хоёр хөршөөс шатахуун орж ирж, олны магнайг тэнийлгэв. 

Тодотговол, урд шөнө буюу есдүгээр сарын 26-ны 20.00 цагт БНХАУ-аас худалдан авч буй 2500 тн шатахуун ачсан эхний 50 вагон Замын-Үүдэд орж ирсэн байна. 

Мөн Ангарскийн нефтийн үйлдвэрээс нийлүүлэх 1500 тонн АИ-92 автобензиний эхний ээлжийн 1210 тонн бүхий 20 вагон шатахууныг Сүхбаатар өртөөгөөр хүлээн авчээ. Улмаар шатахууныг импортлогч аж ахуйн нэгжүүд Улаанбаатар хот руу шуурхай татан авсан талаар Уул уурхай, хүнд үйлдвэрийн яам мэдээллээ. 

Ямартай ч асуудал дагуулж, өндрийг аваад байсан шатахууны асуудал нэг удаадаа шийдэгдэж, гал намжив. Салбарын сайд Г.Ёндон ч үүнийгээ гавьяа байгуулж буй мэт сурталчилж, цээжээ дэлдэж эхэллээ. Тэгэхээр түүнд баяр хүргэх үү, баярлалаа гэх үү.

Намрын их ажлын үед Монгол Улсыг тэр чигт шатахууны хомсдолд оруулсан буруутай этгээдэд хариуцлага тооцохыг Ерөнхий сайд Л.Оюун-Эрдэнэ үүрэгдсэн. Үүнийг мартаж болохгүй. Алдаа гаргасан бол хариуцлага хүлээх ёстой. Гай тарьчихаад гавьяа байгуулсан мэт цээжээ дэлдэх нь зохисгүй. Ард иргэдээ шатахуунаар тасалдуулахгүй хангах, энэ асуудлыг шийдэх нь салбарын яамны хийх ёстой ажил. Гэтэл улс орноо тэр чигт нь шатахууны хомсдолд оруулчихаад өдгөө хэдэн вагон шатахуунаар гэмээ цайруулах гэж буй нь үнэхээр арга ядсан заль шүү Г.Ёндон сайд аа.   

Б.Баатар