Ардчилсан намаас хэвлэлийн хурал хийж, эв нэгдэлтэй болж буйгаа мэдэгдэв. Ардчилсан нам намын Эв нэгдлийн их хурлаа арваннэгдүгээр сарын таванд буюу их эзэн Чингис хааны төрсөн өдрөөр хийж, нэг даргатай болохоор товлосон байна.

Ардчилсан намын дарга асан Э.Бат-Үүл "Өнөөдөр манай намын хоёр залуу удирдагч АН-ын гишүүдийн төдийгүй Монголын ард түмэн сүүлийн жил гаруй хүлээсэн мэдээллийг хүргэнэ. Энэ бол түүхэн үйл явдал. Үндэсний дэвшлийн намын дарга байсан Д.Ганболд, нэр дэвшигч Б.Гарамгайбаатар нар энэ хуралд оролцоно. Замдаа саатсан. Гэхдээ ирж байгаа.

Би 2009 оноос хойш баатрын тэмдэгээ энгэр дээрээ хүндэтгэн зүүж ирсэн.

Өнөөдөр АН-ын түүхэнд гайхалтай үйл явдал болж байна. Хоёр залуу удирдагчаараа бахархаад хэлэх үг олдохгүй байна. Энэ сайхан мөчийг ашиглаад энэ тэмдэгээ эзэнд нь өгье. Ардчилсан намынхаа туганд Монгол Улсын баатрын тэмдэгийг нь зүүж өгье. Мөн намын залуу удирдлагууддаа хандаж 2024 онд АН-ыг амжилтад хүргээрэй гэж хэлье.

Ц.Элбэгдорж, Х.Баттулга хоёрт хандан намдаа ирээч гэж уриалж байна. Н.Алтанхуяг, С.Эрдэнэд хандан намдаа ирээч гэж уриалж байна. М.Энхсайхан, Р.Гончигдорж нарыг уриалж байна. Намаа бүрэн бүтэн болгоход хуран цуглаж, хүчээ нэгтгээч гэж уриалж байна" гэв. 

АН-ын дарга О.Цогтгэрэл "АН-ын уналт, доройтол, ялагдалд томоохон алхам хийхээр бид мэдээлэл хийж байна. Ардчилсан нам амаргүй цаг үеийг туулаад өнгөрч байна. Монголын Ардчилсан нам монгол хүний эрх чөлөөний хүсэл зоригоос төрсөн нам. АН-ын асуудал бол Монголын тусгаар тогтнолын асуудал. Тиймээс 2021 оны 11 сарын 5-нд эв нэгдлийн, эвлэрлийн их хурал болно. Энэ хурлаар АН-ын хоёр даргаас нэгийг сонгоно" гэлээ.

АН-ын дарга М.Тулга "Их хурлаар намын цаашдын дүрэм, улс төрийн соёлын шинэчлэлийг хамтдаа хийнэ. Намд үүсэж буй зөрчлийг үндсээр нь устгах системийн өөрчлөлтийг хийнэ" гэдгийг онцоллоо. 

Б.Баатар