Улсын онцгой комиссын хуралдаанаас гаргасан шийдвэрийн талаар мэдээлэл хийж байна.

Эрүүл мэндийн сайд С.Энхболд "Эрүүл мэндийн салбарт нөхцөл байдал хүнд байна. Ачаалал таазандаа тулсан. Улсын хэмжээнд нийт 27 мянга 83 ортой ч өнөөдрийн байдлаар 21 мянга 700 орон дээр коронавирусний тусламж үйлчилгээг үзүүлж байна. Орон нутгийн хэмжээнд үндсэн тусламж үйлчилгээний 46.9 хувийг, Улаанбаатарт 50.3 хувийг коронавирусийн халдварын тусламж үйлчилгээнд зориулж байна. Үүнээс цааш ор нэмж дэлгэх боломжгүй. Хэрэв нэмж дэлгэвэл бусад тусламж үйлчилгээ алдагдах эрсдэлтэй. 

Дүүргийн нэгдсэн эмнэлгийн 76 хувийг нь зөвхөн коронавирусний тусламж үзүүлж байна. Цаашид тусгаарлах байр, ор дэлгэж болох ч ажиллах хүний нөөц хомсдолтой байна. Эрүүл мэндийн салбар дээд хэмжээндээ тултал ажиллаж байна. Тиймээс иргэд дэглэмээ барьж, халдвараас сэргийлэх хэрэгтэй. Манай улс ор дэлгэж байгаа бусад улстай харьцуулахад өндөр байгаа. 

Манай улс нийт хүн амынхаа 65.4 хувийг вакцинжуулсан. Өнөөдрийн байдлаар 288 мянган хүн III тундаа хамрагдаад байна. Өдөрт дунджаар 13 мянган хүн нэмэлт тунгаа хийлгэж байна. Нас баралт 0.4 хувь байна. Цаашид иргэдийн хамтын ажиллагааны хүчээр халдварыг хумих боломжтой. 

Цаашид бид халдвар авсан иргэдээ биеийн байдлаар нь эрмбэлэн ангилалтыг нарийн зохион байгуулах тушаал гарсан. Өчигдөр гэхэд нэн хүнд 200 хүн эмнэлэгт хэвтэж чадахгүй байсныг эмнэлгүүд рүү татаж авсан. Амьсгалын аппарад хангалттай байгаа. Эмнэлгүүдэд хангалттай тараасан. Хүчилтөрөгчийн өртгөрүүлэгчийг мөн эмнэлгүүдэд хувиарлаж байгаа" гэлээ. 

Б.Баатар