НЭМГ-ын дарга Б.Бямбадоржийн халаа сэлгээний горыг ард түмэн хүртсээр байх уу С.Амарсайхан дарга аа!!! 

Сүүлийн үед тархаад буй дельта хувилбарыг хумьж дөнгөхгүй, газар авахуулж буй гол шалтгаан нь Нийслэлийн Эрүүл мэндийн газрын дарга Б.Бямбадоржийн халаа сэлгээтэй холбоотой гэдгийг УОК-ын дарга С.Амарсайхан нуусангүй. НЭМГ-ын дарга Б.Бямбадорж энэ оны хоёрдугаар сарын 8-ны өдөр үүрэгт ажлаа авсанаасаа хойш нэлээд олон халаа сэлгээ хийжээ.

Тодотговол, тэрбээр НЭМГ-ын Төрийн захиргаа удирдлагын хэлтсийн дарга н.Одгэрэл, Нийслэлийн Түргэн тусламжийн төвийн дарга Р.Пүрэвдаш, Энэрэл эмнэлгийн дарга А.Амартүвшин, Нийслэлийн эмнэлгийн тусламжийн хэлтсийн дарга М.Мөнхдэлгэр, Сонгинохайрхан дүүргийн нэгдсэн эмнэлгийн дарга Б.Галсанцэдэн, Хан-Уул дүүргийн нэгдсэн эмнэлгийн дарга Д.Бааст, Сүхбаатар дүүргийн Эрүүл мэндийн төвийн дарга Л.Баярхүү, Баянзүрхийн дүүргийн Эрүүл мэндийн төвийн дарга Д.Тамир нарыг үүрэгт ажлаас нь чөлөөлсөн байна.

Эдгээр хүмүүс нь нэг сая гаруй хүн амтай нийслэлчүүдэд эрүүл мэндийн тусламж үйлчилгээ үзүүлдэг гол байгууллагуудын удирдлагууд. Шуудхан хэлэхэд, коронавирусний халдвартай анх нүүр тулж, халдварыг барьж, хумих, тандалт судалгаа, хариу арга хэмжээг авахад голлох үүрэг гүйцэтгэж байсан хүмүүс. 

Гэтэл НЭМГ-ын дарга Б.Бямбадорж эдгээр байгууллагын удирдлагуудыг "Баг болж ажиллах боломжгүй" гэх ганцхан шалтгаанаар үүрэгт ажлаас нь чөлөөлсөн байна. Тэдгээр эрхмүүдийн дунд алдаа гаргасан нь бий ч, амжилттай ажиллаж байсан нь ч байх аж. Энэрэл эмнэлгийн дарга А.Амартүвшинг тус эмнэлгийн гадна халдвартай иргэн нас барсан гэх шалтгаанаар ажлаас нь чөлөөлсөн. Мөн эл шалтгаанаар Нийслэлийн түргэн тусламжийн төвийн дарга, Баянзүрх дүүргийн Эрүүл мэндийн төвийн дарга нарыг чөлөөлсөн байдаг. 

Харин Нийслэлийн Шилдэгийн шилдэг, Шилдэг байгууллагаар удаа дараа шалгарч байсан Сүхбаатар дүүргийн Эрүүл мэндийн төвийн дарга Л.Баярхүү, Хан-Уул дүүргийн нэгдсэн эмнэлгийн дарга Д.Бааст нарыг тэдгээрийн хоморгонд оруулж, ажлаас нь чөлөөлсөн байх аж. 

Энэ нь ч асуудал дагуулж, өчигдөр Улсын онцгой комиссын хуралдаан дээр яригдсан байна. УОК-ын дарга С.Амарсайхан энэ талаар "Дүүргүүдийн эмнэлгийн дарга нарыг ажлаас нь чөлөөлсөн асуудал УОК-ын хуралдаан дээр яригдсан. Хэд, хэдэн дүүргийн эмнэлгийн дарга нар солигдсон байна. Энэ амаргүй, өндөр ачаалалтай ажиллаж байгаа цаг үед халаа сэлгээ хийдэг, суудал сандлын асуудал ярьдаг байж огт болохгүй. Эрүүл мэндийн салбар доголдох эрсдэл үүсэж болзошгүй байна. Үнэхээр халаа сэлгээ хийхээр бол цаг үеэ олж хийх хэрэгтэй. Энэ хүндрэлтэй нөхцөл байдалд ийм асуудал гаргаж болохгүй гэдэг үүрэг даалгаврыг НЭМГ-ын дарга Б.Бямбадоржид өгсөн" хэмээсэн юм. Түүний хэлж буйтай олон хүн санал нэг байна.

НЭМГ-ын дарга Б.Бямбадоржийн томилсон дарга нар нь коронавирусний цар тахлын үед ажлаа хийж чадахгүй, мэдлэг, туршлага дутаж байгаа. Үүнээс үүдэж, халдварт өвчин газар авсаар байгааг салбарынхан нь нуулгүй хэлж байна.

Тухайлбал, Сүхбаатар дүүргийн Эрүүл мэндийн даргаар томилогдсон П.Бат-Ирээдүй нь эл албанд очсоноосоо хойш коронавирусний халдварын эсрэг хариу арга хэмжээ авах эмнэлгийн шуурхай штабын бүрэлдэхүүнд өөрчлөлт оруулж, халаа сэлгээ хийх болжээ. Үүгээрээ ч зогсохгүй тэрбээр баг хамт олноо зөв менежметээр удирдах ажлаа хийх бус ажлын байран дээрээ төлбөрт үзлэг хийж, өмнө нь ажиллаж байсан эмнэлэгтээ хагалгаа хийх зэргээр үндсэн ажлаа цалгардуулах болсон байна. Энэ нь ч халдварт өвчнийг улам дэвэргэж байна гэдгийг эмч, мэргэжилтэнгүүд нь хэлж байгаа юм. 

Гэтэл НЭМГ-ын дарга Б.Бямбадорж "Эрүүл мэндийн салбарын хэмжээнд ачаалалтай ажиллаж байна. Зохион байгуулалтын хувьд хийдэл алдаа гаргахгүй байх талаар санаачилгатай ажиллаж байгаа. Ажлын хариуцлага алдах, өндөр эрсдэл гарах магадлалтай учир хоёр дүүргийн Эрүүл мэндийн төвийн даргыг сольсон" хэмээн хээвнэг яриад сууж байх. 

Нэг үгээр хэлбэл Б.Бямбадорж даргын өнгө үзэмжнээс шалтгаалсан халаа сэлгээний горыг ард түмэн, халдварт өвчинтэй цаг наргүй тэмцэж буй эмч, эмнэлгийн ажилчид амсаж байна. Тиймээс УОК-ын дарга С.Амарсайхан хэлсэн үгээ хийдүүлэлгүй, дээрх асуудалд анхаарал хандуулж, том толгой гаргаж буй Б.Бямбадорж даргад хариуцлага тооцохыг олон нийт шаардаж байна. 

Б.Баатар