Бүх зүйлд Л.Оюун-Эрдэнийн зөв. Учир нь тэр Монгол Улсын Ерөнхий сайд, МАН-ын дарга. Хариуцсан ажилдаа алдаа гаргасан бол алдаагаа засаж, ухамсарлах нь хувь хүний энгийн бодгаль. Гэтэл Ерөнхий сайд Л.Оюун-Эрдэнэ ямар ч зүйлд буруугүй, түүний зөв байдаг гэдгийг журмын нөхөд нь үргэлж баталж, цээжээрээ хамгаалах боллоо.

Хамгийн сүүлд гэхэд Ерөнхий сайд Л.Оюун-Эрдэнэ ICT экспоны нээлтийн үеэр олон зуун хүн цуглуулж, халдвар хамгааллын дэглэм зөрчиж, ард иргэдийнхээ амь нас, эрүүл мэндэд заналхийлсэн. Үүнийх нь гор ч одоо гарч, халдварын тоо нэмэгдэж, нас баралт урд өмнө байгаагүйгээрээ бүртгэгдэж байна. Тиймээс ч Ерөнхий сайдыг хариуцлага хүлээх ёстой гэдгийг ард түмэн хэлж, шаардаж буй. 

Гэтэл Ерөнхий сайд Л.Оюун-Эрдэнэ  “Цаашдаа нийтийг хамарсан гадаах арга хэмжээг зохион байгуулна. Шүүмжлэлээс айхгүй” гэдгээ мэдэгдсэн. Тэгвэл үүнийг нь ч өчигдөр Шадар сайд, УОК-ын дарга С.Амарсайхан бататгаж, гадаах арга хэмжээг цаашид ч зохион байгуулах болно гэдгийг онцлов.

Тэрбээр "Covid-19 халдвар ойрын жилүүдэд арилахгүй гэдгийг ДЭМБ болон судлаачид хэлж байгаа. Тиймээс гадаах орчинд зохион байгуулж байгаа олон нийтийн үйл ажиллагааг цаашид ч зохион байгуулна. Хамгийн гол нь иргэд өөрсдийгөө эрсдэлд оруулахаас урьдчилан сэргийлэх шаардлагатай" гэсэн юм. 

Угтаа дельта вирусны халдвар эрчимтэй тархаж, эрүүл мэндийн салбарын ачаалал таазандаа тулсан. Тиймээс хүн бүр халдвар хамгааллын дэглэмээ баримтлах хэрэгтэй байна гэдгийг салбарын сайд нь учирлаж буй.

Гэсэн ч Ерөнхий сайдыгаа хамгаалахын тулд тэд гадаах арга хэмжээг цуцлахгүй нь. Харин тэдний энэхүү шийдвэр эв нэгдлээ зарлаад буй Ардчилсан намд зол боллоо.

УИХ дахь АН-ын бүлгийн гишүүд өнгөрсөн долоо хоногт мэдээлэл хийж, УИХ-ын дарга, МАН-ын олонхийн бүлэгт шаардлага хүргүүлсэн. Улмаар ирэх сарын нэгний өдөр Төв талбайд гарч, жагсахыг уриалаад байгаа юм. Энэ талаар УИХ дахь АН-ын бүлгийн гишүүн Б.Пүрэвдорж "Эрх баригчид ард иргэдийг туйлдуулж байна. Одоо боллоо. "Одоо боллоо" уриатайгаар ирэх сарын 1-нд төв талбайд цуглана. Ковид нэрийдлээр зарцуулагдсан нийт 20 их наяд төгрөгийн хөтөлбөрийн зарцуулалт ил биш байна. Ковидын 5,1 их наяд төгрөгийн хөтөлбөрийн 2,4 их наяд төгрөгийнх нь тайлан байгаад 2,7 нь байхгүй байх жишээтэй. Үүнийг эрх баригчид хулгайлсан. 10 их наядын үр дүн гарахгүй байна. Нийт 20 их наядыг ковидын эсрэг зарцуулсан ч үр дүн гарахгүй байгаа. Засгийн газар хариуцлагагүй ажилласны үр дүнд шатахуун хомсдоод байна. Үнэхээр одоо боллоо. Тиймээс аравдугаар сарын нэгэн өдөр иргэд Төв талбай дээр ирж, үзэл бодлоо илэрхийлэхийг уриалж байна" гэсэн билээ. 

Ямартай ч Улсын онцгой комиссын дээрх шийдвэр Ерөнхий сайд Л.Оюун-Эрдэнийг хамгаалсан ч сөрөг хүчинд боломж олгов. 

Б.Баатар