“Digital Nation -2021” нэрийн дор зохион байгуулсан шоуны дуулиан үргэлжилсээр байна. Дээрх арга хэмжээтэй холбоотойгоор Харилцаа холбоо, мэдээлэл технологийн газрын дарга Б.Болор-Эрдэнийг Авилгатай тэмцэх газраас шалгаж эхэлсэн талаар эх сурвалж мэдээлэв. 

Харилцаа холбоо, мэдээллийн технологийн салбарын үзэсгэлэн “ICT EXPO-2021” арга хэмжээг төрийн мөнгөнөөс нэг ч төгрөг гаргаагүй, зөвхөн хамтран ажиллагч байгууллага, аж ахуйн нэгжийн дэмжлэгтэйгээр зохион байгуулсан болохыг тэд тодотгож байсан.

Тэгвэл Харилцаа холбоо, мэдээлэл технологийн газрын дарга Б.Болор-Эрдэнийг дээрх үйл ажиллагааг зохион байгуулахдаа албан тушаалаа урвуулан ашиглаж, мөнгө угаасан байж болзошгүй хэмээн АТГ-аас шалгаж байгаа аж.

Тодотговол, Б.Болор-Эрдэнэ нь “ICT EXPO-2021” арга хэмжээг гардан зохион байгуулсан байгууллагыг сонгохдоо өөрийн хүрээллийн гэгдэх “Мэдээллийн технологийг дэмжих соёмбо холбоо” НҮТББ-д давуу байдал олгосон. “Digital Nation -2021” арга хэмжээг ивээн тэтгэсэн байгууллагуудаас их хэмжээний мөнгө авсан. 

Мөн Харилцаа холбоо, мэдээллийн технологийн салбарын 100 жилийн ойн тэмдгээ 50 мянган хувь хэвлүүлж, нэг бүрийг нь 20 мянган төгрөгөөр борлуулсан гэх мэдээллүүдтэй холбоотойгоор шалгаж байгаа гэх.

Эхнээсээ хэл ам дагуулсан уг арга хэмжээнд 120 гаруй компани оролцсон болохыг Харилцаа холбоо, мэдээлэл технологийн газраас мэдээлсэн. Харин тэдгээрээс чухам хэдэн төгрөг зугларсан, ямар хэмжээний зардал гарсан талаарх мэдээлэл огт байхгүй. Энэ нь Харилцаа холбоо, мэдээлэл технологийн газрын дарга Б.Болор-Эрдэнийг хардах, шалгах шалтгаан болсон байхыг үгүйсгэхгүй юм. 

Ямартай ч ард иргэдийг халдварын эрсдэлд оруулсан уг шоуны дуулиан нэг хэсэг л тасрахгүй нь. 

Б.Баатар