Засгийн газрын ээлжит хуралдаанаас гарсан шийдвэрийг танилцуулж байгаа. Энэ үеэр ХЗДХ-ийн сайд Х.Нямбаатар С.Зориг агсны амь насыг бүрэлгэсэн хэргийн талаарх сэтгүүлчийн асуултад хариулт өглөө.

Тэрбээр "С.Зориг агсны амь насыг хөнөөсөн хэргээр гурван хүнд ял оноогоод байсан. Ялтнуудын өмгөөлөгчдөөс энэ хэргийг мөрдөн шалгах явцдаа эрүүдэн шүүсэн гэх гомдол гаргасан байдаг. Энэ гомдлын дагуу шалгаад эрүүдэн шүүсэн гэдэг нь тогтоогдсон тул өмнөх шийдвэрүүдийг Улсын Дээд шүүх хүчингүй болгосон.

Үүний дагуу тухайн хүмүүс эрх чөлөөтэй байгаа. Хэрэг мөрдөн байцаалтад буцсан учраас шинээр ажлын хэсэг байгуулагдсан. Энэ ажлын хэсгийг Тагнуулын ерөнхий газар дээр байгуулсан. Цагдаагийн ерөнхий газраас бүрэлдэхүүн багтсан байгаа.

С.Зориг агсны амь насыг бүрэлгэсэн хэрэгтэй холбоотойгоор хэд хэдэн эрүүгийн хэрэг мөрдөн байцаалтын шатанд явж байгаа. Тухайлбал, Гүйцэтгэх ажлын хууль тогтоомж зөрчсөн гэх хэрэг, С.Зориг агсны амь насыг хөнөөсөн гэх хэргээс тусгаарласан захиалагчтай холбоотой хэрэг, үндсэн хэрэг буюу сая буцаасан хэрэг мөрдөн байцаалтын шатандаа явж байгаа. Захиалагчид холбогдох хэргийг үндсэн хэрэгтэй нэгтгэх чиглэлээр тодорхой ажил хийгдэх байх" гэлээ.

Б.Баатар