Монгол Улсын Засгийн газар муу ажиллаж байна. Эрх баригчид ард иргэдийнхээ амь нас, эрүүл мэндийг уландаа гишгэж, эрүүл мэнд ч үгүй, эдийн засаг ч үгүй болох нь гэдгийг УИХ-д суудалтай намууд хэлж, энэ тал дээр дорвитой ажил хийхийг шаардаж буй.

Тодотговол, УИХ-дахь Ардчилсан намын бүлгээс Ерөнхийлөгч, УИХ-ын дарга, Ерөнхий сайд нарт шаардлага хүргүүлсэн. Улмаар маргааш буюу аравдугаар сарын нэгний өдөр "Одоо боллоо" жагсаалыг Төв талбай дээр зохион байгуулна гэдгээ мэдэгдсэн билээ. 

Ардчилсан намаас УИХ-ын даргад, "Монгол Улс ковидын улмаас нас барсан иргэдийн тоогоор дэлхийд нэгдүгээрт бичигдэж, намрын ид ажлын үеэр шатахууны хомсдолд орж, 12-13 аймагт малын шүлхий өвчин тархаад байна. Нөхцөл байдал ийм хүнд үед УИХ ээлжит бус чуулганыг нэн даруй хуралдуулах ёстой" гэх шаардлагыг хүргүүлсэн ч эл шаардлага биелэлгүй намрын чуулганы нээлттэй золгов. 

Харин Ерөнхий сайд, Засгийн газар хариуцлагаа хүлээж, илүү чадвартай хүнээр улс орныг удирдуулах ёстой. Засгийн газартаа хариуцлага тооцож чадахгүй бол УИХ өөрөө тарахыг шаардсан байдаг. 

Ерөнхийлөгч У.Хүрэлсүхэд мөн шаардлага хүргүүлсэн билээ. 2021 оны гуравдугаар сарын 1-нд МАН-ын 100 жилийн ой тэмдэглэхээс эхлээд, сонгуулийн сурталчилгаа хийх, уул овоо тахих нэрийдлээр хөдөө орон нутагт халдварыг хавтгайруулсан. Энэ бүхнийхээ төлөө Монголын ард түмнээс уучлалт гуйх ёстой" гэж шаардаж, улмаар “Одоо боллоо” нэртэй эсэргүүцлийн цуглааныг аравдугаар сарын 1-нд талбай дээр зохион байгуулахыг нийт иргэддээ уриалсан юм.

Тэгвэл Ардчилсан намын дээрх жагсаалд УИХ-д суудалтай Хөдөлмөрийн үндэсний нам хүч нэмэх бололтой. Тодруулбал, ХҮН энэ сарын 25-ны өдөр Монгол Улсын Засгийн газарт шаардлага хүргүүлж, улмаар Засгийн газар үүссэн нөхцөл байдлыг яаралтай шийдэж ажиллахгүй тохиолдолд Улсын Их Хуралд суудалтай улс төрийн хүчний хувьд Засгийн газрын танхимд хариуцлага тооцох асуудлыг албан ёсоор тавина гэдгээ мэдэгдсэн юм.

ХҮН-аас Монгол Улсын Ерөнхий сайд, холбогдох Засгийн газрын гишүүд, агентлагийн дарга нарт хариуцлага тооцох, эмнэлэг, цагдаа, онцгой байдлын салбараас бусад төрийн байгууллагуудын тээврийн хэрэгслүүдийг худалдан борлуулж, түлш, шатахуун, тээврийн хэрэгслийн аливаа зардлыг тэглэх, нийтийн тээвэр, такси, цахилгаан тээврийн хэрэгсэл ашиглах нөхцөлийг бүрдүүлэх, хил, гаалийн боомтын үйл ажиллагааг эрчимжүүлж, урд хөрш рүү хил нэвтэрч буй нүүрс болон ачаа тээвэрлэлтийн үеийн корона вирусийн халдварын тохиолдлыг тэг болгох замаар экспортын урсгалыг нэмэгдүүлэхэд онцгой анхаарал  хандуулах шаардлагыг тавьсан байдаг. 

Ингэхээр дээрх намууд нэгдэж, эрх баригчдад хатуу сануулга өгөх нь. Түүнчлэн эх сурвалжийн мэдээлж буйгаар маргаашийн жагсаалд МАН-ын шинэ жигүүрийнхэн ч нэгдэх аж.

Б.Баатар