Манай улсад коронавирусний халдвар тархснаас хойш 300 гаруй мянган хүн өвчилж, 1204 хүн нас бараад байна. Энэ бол албан ёсоор бүртгэгдсэн тоо. Үүнээс ч их байхыг үгүйсгэхгүй. Сүүлийн өдрүүдэд коронавирусний халдварын хүндрэлийн улмаас нас барах хүний тоо буурахгүй өдөрт 17-19 хүн хорвоогийн мөнх бусыг үзүүлж байна. Үүнд тангараг өргөсөн эмч нар, хайртай дотны хүнээ цаг бусаар алдаж буй ард түмэн л эмгэнэн гашуудаж байна.

Гэтэл "Монгол хүн монголын баялаг. Баялагтаа эзэн монгол" хэмээн хэдхээн сарын өмнө уухайлан хашгирч байсан Монгол Улсын Ерөнхийлөгч У.Хүрэлсүх ард түмнийхээ амь нас, эрүүл мэндийн төлөө Үндэсний аюулгүй байдлын зөвлөлийг хуралдуулаагүй атлаа "Тэрбум мод" үндэсний хөтөлбөрийг хэрэгжүүлэхийн тулд хуралдуулав. 

Байгаль орчноо хамгаалах, цөлжилт, газрын доройтлын эсрэг үндэстнээрээ эв нэгдэлтэй, нэг зүгт харж зүтгэх цаг болсон гэх Ерөнхийлөгч У.Хүрэлсүхийн үгтэй олон хүн санал нийлнэ. Гэвч энэ нь цаг үеэ олсон ажил биш гэдгийг ард түмэн хэлж, бухимдаж байна. Коронавирусний халдвар хэдийнэ цар тахал болж, хяналтаас гарч, монголчууд эдийн засаг ч үгүй, эрүүл мэнд ч үгүй боллоо.

Эрүүл мэндийн салбарын ачаалал ч таазандаа тулсан гэдгийг салбарын сайд нь нуугаагүй. Байдал ийм дээрээ тулчихаад байхад Монгол Улсын Ерөнхийлөгч У.Хүрэлсүх энэ тал дээр нэг ч үг дуугарахгүй байгаа нь хачирхалтай. 

Угтаа тэрбээр ард түмнийхээ эрүүл мэндийн төлөө, нэг ч болтугай иргэнийхээ амь насыг эрсдүүлэхгүй байхын төлөө Үндэсний аюулгүй байдлын зөвлөлийг хуралдуулсан бол ард түмэнд түүнд талархаж, алга ташин баяр хүргэх байв. 

Гэвч тэрбээр НҮБ-ын Ерөнхий Ассамблейн 76 дугаар чуулганд оролцох үеэр 2030 он гэхэд Монгол Улсад тэрбумаар тоологдох мод тарьж ургуулах үндэсний хөдөлгөөнийг эхлүүлнэ гэж мэдэгдсэн амлалтаа биелүүлэхээр ийнхүү цаггүй ажиллаж байна. Түүнд олон улсад цуурайтах нэр хүнд чухал ч гэлээ ард түмнийх нь амь наснаас илүү эрхэм байна гэж үгүй байлтай. 

Тиймээс Монгол Улсын Ерөнхийлөгч У.Хүрэлсүхийг мод тарихын тулд бус иргэдийнхээ эрүүл аюулгүй орчинд амьдрах Үндсэн хуулиар олгогдсон эрхийг хэрэгжүүлэхийн тулд Үндэсний аюулгүй байдлын зөвлөлийг нэн яаралтай хуралдуулж, энэ асуудалд анхаарал хандуулахыг ард түмэн шаардаж байна. 

Б.Баатар