Ардчилсан намаас өнөөдөр Сүхбаатарын талбайд "Одоо боллоо" жагсаалыг зохион байгуулж байгаа. Тус намаас төр, засгийн хэрэгжүүлж буй бодлого, шийдвэрт шүүмжлэлтэй хандаж, Засгийн газрыг огцруулахыг шаардаж байгаа юм. 

Тэгвэл тус жагсаалын үнэн төрх олон нийтэд ил боллоо. Тодруулбал тэрбээр дээрх жагсаалыг нөхөн сонгуульд зориулан хийж байгаа хэмээгээд намын нөхдөөсөө санхүүжилт өгөхийг уриалсан байна. Тодотгол, УИХ-ын гишүүн Б.Пүрэвдорж цахим хуудсаараа "Нөхөн сонгууль, түүнтэй холбоотой хийгдэж байгаа жагсаалд зориулж хандив өгөхийг гишүүдээсээ хүсэж байна. Бат-Эрдэнэ, Цогтгэрэл болон миний бие хандив өгсөн байна. Та бүхнийг анхаарлаа хандуулахыг хүсч байна" гэжээ. 

УИХ-ын гишүүн Б.Пүрэвдорж өмнө нь жагсаал зохион байгуулах шалтгаанаа тайлбарлахдаа "Монгол Улс ковидын улмаас нас барсан иргэдийн тоогоор дэлхийд нэгдүгээрт бичигдэж, намрын ид ажлын үеэр шатахууны хомсдолд орж, 12-13 аймагт малын шүлхий өвчин тархаад байна. Ерөнхий сайд, Засгийн газар хариуцлагаа хүлээж, илүү чадвартай хүнээр улс орныг удирдуулах ёстой. Засгийн газартаа хариуцлага тооцож чадахгүй бол УИХ өөрөө тарахыг шаардаж байгаа. Мөн Ерөнхийлөгч У.Хүрэлсүхэд мөн шаардлага хүргүүлсэн билээ. 2021 оны гуравдугаар сарын 1-нд МАН-ын 100 жилийн ой тэмдэглэхээс эхлээд, сонгуулийн сурталчилгаа хийх, уул овоо тахих нэрийдлээр хөдөө орон нутагт халдварыг хавтгайруулсан. Энэ бүхнийхээ төлөө Монголын ард түмнээс уучлалт гуйх ёстой" хэмээж байсан ч тус жагсаал ард түмний төлөө бус нөхөн сонгуульд зориулагдсан гэдэг нь ийнхүү ил боллоо.   

Б.Баатар