Омскийн цөөхүүл найрал хөгжмийн уран сайхны удирдагч Баатаржавын Энхбаатар 9 сарын 29-нд намар цагийн нээлтээ хийж байна. Саяхан энэхүү шинэ албанд томилогдсон Б.Энхбаатар буюу оросуудын нэрлэж заншсанаар маэстро Энхээ тус найрал хөгжмийн 22 дахь жилийн концертын сезоныг И.С.Бахын бүтээлүүдээр нээхээр шийджээ. 1991 оноос ОХУ-д суурин амьдарч, ажиллаж, алдар нэрээ дуурсгаж яваа монгол маэстро урьд нь Уралын залуучуудын симфони найрал хөгжмийн удирдаач, Уралын эрдмийн дагшаа найрал хөгжмийн чуулгын ерөнхий удирдаачаар ажиллаж байсан “мундаг амьтан”.

Тэрээр Монгол улсын нийслэл Улаанбаатар хотноо нэрт удирдаач Цэдэвийн Баатаржавын хүү болж төрсөн, удам дамжсан удирдаач. Оросын хэвлэлүүд түүний намтрыг сөхөх болгондоо удирдаачийн “эзэнт гүрэн” буюу “династия”-гийн төлөөлөгч гэж заавал дурддаг юм. Дорноговь аймгийн Улаанбадрах сумын уугуул, Монгол улсын урлагийн гавьяат зүтгэлтэн Ц.Баатаржав агсан Санкт-Петрбург хотын Н.Римский-Корсаковын нэрэмжит ХДэС-д удирдаачийн мэргэжлээр суралцсан бөгөөд УДБЭТ, Улсын Филармони, ҮДБЭЧ-д удирдаач, ерөнхий удирдаачаар ажиллаж байсан билээ.

Харин нэрт удирдаачийн удам залгасан хүү Энхээ нь Улаанбаатарын ХБДуС-иа залгуулаад М.П.Мусоргскийн нэрэмжит Уралын консерваторийг виолончель болон симфони найрал хөгжмийн удирдаач гэсэн хос мэргэжлээр төгссөн байна. Түүний олон шагналын оргил нь Сергей Прокофьевын нэрэмжит олон улсын удирдаачдын уралдааны шагнал. Мөн “Музыкальное обозрение” буюу “Хөгжмийн боловсрол” сэтгүүлээс шалгаруулсан “2008 оны хүн” диплом.

Аав нь Ц.Намсрайжав, Б.Дамдинсүрэн нарын “Анчин ба согоо”-гоос эхлээд  Л.Минкусын “Баядерэ”, Ж.Пуччинийн “Чио чио сан”-ыг Монголд удирдаж байсан бол хүү Энхээ нь Вашингтоны Кеннеди центр, Москвагийн консерваторийн их танхим зэрэг хөгжимчдийн мөрөөдөл болсон газруудад удирдаачийн саваагаа дохин зогсож байжээ. Баатаржавын Энхбаатарын удирдсан найрал хөгжимчид Парис, Берлиний нэр хүндтэй танхимуудаас сонгодог хөгжим шүтэгчдийн нижигнэсэн алга ташилт цуглуулж байсан юм.