Одоогоос 23 жилийн өмнө буюу 1998 оны аравдугаар сарын хоёрны өдөр төр, нийгмийн нэрт зүтгэлтэн С.Зориг агсны амь насыг хөнөөсөн аймшигт хэрэг гарсан билээ. Гэсэн хэдий ч эл хэргийн үнэн мөн тогтоогдоогүй өнөөдрийг хүрээд буй. Улстөрчид эл хэргийг сонгуулийн шоу болгож, ялалт байгуулах гол хэрэгсэл болгосоор ирсэн. Хамгийн сүүлд гэхэд Ерөнхийлөгчийн сонгуульд ч эл хэргийг ашигласан гэдгийг хэлэх хүн олон байдаг.

Тэгвэл С.Зориг агсны амь насаа алдсан өдөр эл хэргийн дуулиан дахин нийгэмд дэгдэж, улстөрчид "үзэлцэж" эхлэв.

Тодотговол, аравдугаар сарын нэгэн буюу С.Зориг агсны амь насаа алдсан өдрийн өмнөх орой тус хэрэгт буруутгагдан гурван шатны шүүхээс ял сонсож байсан Т.Чимгээ телевизийн нэвтрүүлэгт орж ярилцлага өгсөн нь дуулиан дэгдээсэн.

Энэ талаар УИХ-ын гишүүн Б.Энхбаяр "С.Зоригийг алсан өдөр нь түүнийг алсан хэргийн яллагдагчийг (шалгагдаж буй ял сонссон сэжигтэн) яриулжээ. Утгыг нь алдуулж байна даа. Бараг зорилго нь ч тийм байх. Хүн амины сэжигтэн Т.Чимгээ, Б.Содномдаржаа нар батлан даалтад гарч, С.Зоригийн хэрэг дахин нууцад орж замхарлаа.

Одоо С.Зоригийн алуурчдын хэргийг захиалагчдын хэрэгтэй нэгтгэн шалгана гэж Хууль зүйн сайд мэдэгдсэн. Энэ бол илэрсэн алуурчдыг “илрээгүй” захиалагчаар бамбайлж хэргийг юу ч биш болгох, алуурчдын хэргийг шүүх рүү явуулахгүй “тогтоон барих” технологи мөнөөсөө мөн. Хараад л байгаа. 

Т.Чимгээ, Содномдаржаа нарыг Улсын Дээд шүүхээс ГЭМ БУРУУГҮЙ гэсэн шийдвэр гаргаагүй. Дахиад шалгаад ир гэж нэмэлт мөрдөн байцаалтанд буцаасан бөгөөд яллагдагч (ял сонссон сэжигтэн) статустай байгаа. Шүүхийн урдуур орж харин “шийдвэр” гаргадаг улс төрчид манайд байгаа нь бол үнэн" хэмээсэн юм. 

Харин энэ нь ХЗДХ-ийн сайд Х.Нямбаатарын эгдүүцлийг төрүүлжээ. Тэрбээр Б.Энхбаяр гишүүнд хандаж, "Хүн сайд дарга болох хүсэлтэй байж болно. Гэхдээ ингэж гүтгэж дайрч болохгүй.

ХЗДХЯам мөрдөн шалгах ажиллагаа явуулдаггүй. Эцэс сүүлдээ дээрх хэргийг миний бие ирүүлэхгүй тогтоон барьж байгаа гэдэг мессежийг нийгэмд өгч шүүхээс гэм буруугүйд тооцогдсон хүмүүсийг алуурчин гэж зарлах нь Их хурлын гишүүний бүрэн эрхэд байхгүй гэдгийг хэлье" гэжээ.

Ямартай ч С.Зориг агсны хэрэг дахин олны анхааралд өртөж, улстөрчдийг талцуулж эхэллээ. 

Б.Баатар