Ерөнхийлөгчийн санаачилгаар “Тэрбум мод” үндэсний хөдөлгөөн өчигдөр албан ёсоор эхэлсэн. Энэ үеэр Монгол Улсын Ерөнхийлөгч У.Хүрэлсүх сэтгүүлчдийн асуултад хариулахдаа НҮБ-ын Ерөнхий нарийн бичгийн даргыг андуурч хэлсэн нь олны дургүйцлийг төрүүлээд буй.

Тодруулбал, Ерөнхийлөгч У.Хүрэлсүх “Би НҮБ-ын хуралд оролцож үг хэлсэн. Дараа нь НҮБ-ын Ерөнхий нарийн бичгийн дарга Кофи Аннантай уулзсан. Мөн НҮБ-ын Хөгжлийн хөтөлбөрийн удирдагчтай уулзсан” гэсэн юм. 

Гэвч түүний уулзсан хэмээх НҮБ-ын Ерөнхий нарийн бичгийн дарга асан, Нобелийн Энх тайвны шагналт Кофи Аннан нь 2018 оны наймдугаар сард таалал төгссөн. Тэрээр 1997 онд НҮБ-ын долоо дахь Ерөнхий нарийн бичгийн даргаар томилогдож, 2006 оны арванхоёрдугаар сар хүртэл ажилласан юм. Түүнээс хойш НҮБ-ын Ерөнхий нарийн бичгийн дарга хоёр ч удаа солигдсон бөгөөд 2017 оноос хойш өнөөдрийг хүртэл Антониу Гутерриш НҮБ-ын ес дэх Ерөнхий нарийн бичгийн даргаар ажиллаж байгаа билээ.

Тэгвэл Ерөнхийлөгч У.Хүрэлсүхийн энэхүү алдааг УИХ-ын гишүүн М.Оюунчимэг цээжээрээ хамгаалж, хуучин ажиллаж байсан тогоо руугаа нулимаж орхив.

Тэрбээр "Ярилцагчийнхаа алдааг нийтэд цацаж доромжлуулах нь ёс зүйтэй сэтгүүл зүй биш л дээ!!? ЯЛГАА: Мэргэжлийн сэтгүүлчид засдаг, залруулдаг. Сайн дурынхан тавладаг тохуурхдаг. Санкт-Петербургийн УИС-н сэтгүүл зүйн факультетэд 5 жил сурахдаа хамгийн сайн ухаарсан мэргэжлийн ёс зүй минь" хэмээн цахим хуудаснаа бичжээ. Энэ нь мэргэжил нэгт нөхдүүд болон мэргэжлийн багш нарын дургүйцлийг төрүүллээ. Түүний сурч, олж авсан гэх ёс зүй нь мэргэжлийн сэтгүүл зүйн ёс зүйн хичээл дээр заадаггүй болохыг ч мэргэжлийн багш нар хэлжээ. 

Б.Баатар