Эрүүл мэндийн сайд асан С.Ламбаа Улсын онцгой комисс, Эрүүл мэндийн яаманд хандаж, бодлогын асуудлаа шийдэх талаар зөвлөжээ.

Тэрбээр "Ковидын халдвар буурахгүй, нас баралт өндөр хэвээрээ байна. Энэ үед анхаарал татсан хэдэн асуудлыг хэлэхгүй бол болохгүй нээ.

Нэгдүгээрт, энэ улаан бүс гэж мэргэшсэн хэдэн эмч нараа 14 хоног түгждэгээ зогсоогоочээ. Одоо зохицож амьдрая гээд ярьчихаад өөр юм хийгээд байх юм.

ХӨСҮТ, АШУҮИС-ын эмнэлэг хоёр аль хэдий нь болиод жирийн дэглэмд шилжээд эмч сувилагчид нь бүгдээрээ зөвлөлдөж, асуудлаа шийддэг болчихсон байна ш дээ. Бусад эмнэлгүүдээ энэ зарчмаар ажиллуулаачээ.

Хоёрт, УОК, ЭМЯ халдвар авсан хүмүүсийг хөнгөн хүндээр нь ялгаж, хэнийг хаана хэвтүүлэхээ шийддэг бүдүүлэг зохицуулалтаа болиочээ. Мэргэжлийн байгууллагуудын хүлээн авахын үүргийг гүйцэтгэж, тэдний дотоод асуудалд хэтэрхий оролцож байгаагаагаас эмнэлгүүд хүнд хүнээ хурдан шуурхай хүлээн авч эмчилгээнд оруулах боломжгүй болсон тухай эмч нар ярьж байна. Үүнээс болж иргэд хохирч байна.

Гуравдугаарт, Халдвар авсан бүх хүнээ ӨЭМТ-ийн мэдэлд орхиж байгаа тохиолдолд Өрхийн эмч сувилагчдын хүчийг тарамдуулахгүй зөвхөн ӨЭМТ дээр нь төвлөрүүлж, үзлэг, товлолын болон ковидын дархлаажуулалтаа хийж, халдвар авсан 70 орчим мянган хүн, байнгын хяналтад байдаг өндөр настан, нялхас, жирэмсэн болон төрсөн эхчүүдийг эргэж тойрч, үзэж, хяналт тавьдаг, иргэдэд утсаар ярьж зөвлөгөө өгөх боломжийг бүрдүүлээчээ.

Дөрөвдүгээрт, Эмийн багцийг өрхийн эмч нар эмийн сан, компаниудаар явж бүрдүүлж, боож савладаг, халдвар авсан хүнд хүргэдэг тогтолцоог өөрчлөөчээ. Үнэндээ хуулиар бол эмч хүн эм барих эрхгүй шүү дээ. Сүүлдээ эм нь ховордож, үнэ нь нэмэгдэж, даатгалын мөнгө нь орохгүй удсанаас өрхүүд эмийн өрөнд орж дууслаа. Энэ бүхнийг оновчтой зохицуулаачээ.

Тавдугаарт, Халдварын улмаас амь тэнссэн үед ХӨСҮТ мэтийн томоохон төвд онцгой зөвшөөрлөөр хийж буй тариаг журам зааврыг нь сайтар боловсруулж, цахим сургалт явуулж, аймгуудын сэхээний тасгуудад хэрэглэх нөхцлийг бүрдүүлвэл яасан юм бэ. Хөдөө орон нутагт нас баралт ихсээд байна. Хүмүүс нэг тариа байдгийн байна гээд янз бүрийн тарианы нэр хэлээд эрэл сурал болоод байна. Энэ чинь аюултай шүү дээ дарга нараа. Эцэст нь УОК, ЭМЯ эмнэлэгт хэвтэх хүнээ зохицуулах гэхээсээ илүүтэй энэ мэтийн бодлогын асуудалд анхаарлаа хандуулах нь чухал байна шүү. Би зүгээр л санаа зовоод саналаа бичлээ. Уучлаарай" хэмээсэн байна. 

Б.Баатар