Шатахуун хомсдож байгааг мэдэгдсэн "Содмонгол групп"-ын гүйцэтгэх захирлын албан бичиг ил боллоо

Өчигдөр оройноос эхлээд шатахууны хомсдол дахин үүсэж байгаа гэх мэдээлэл цахим орчинд тархаж, иргэд өмнөх шигээ шатахуунд дугаарлаж эхэлсэн.

Тэгвэл энэхүү үйл явдалтай холбоотойгоор өнөөдөр АМГТГ-аас мэдээлэл хийж, хомсдол үүсээгүй. Шатахууны татан авалт хэвийн явагдаж байгаа учир иргэдийг тайван байхыг хүссэн.

Мөн өчигдөр "Содмонгол" групп өөрийн албан ёсны цахим хуудсаараа "Аравдугаар сарын 5-ны орой нийгмийн сүлжээгээр тус компанийг бензины хязгаарлалт хийж эхэлж байгаа тухай худал мэдээлэл явж, үйлчлэгч олныг төөрөгдүүлэн шатахуун түгээх станцууд дээр шаардлагагүй дараалал үүсгээд байна. Тус компанид бензин шатахууны нөөц хэвийн хэмжээнд хүрэлцээтэй байгаа бөгөөд бензин шатахууны түгээлтэндээ ямар нэгэн хэмжээ тогтоогоогүй хэвийн горимоор түгээн борлуулж байгаа болохыг үйлчлүүлэгч, харилцагч та бүхэндээ үүгээр мэдэгдэж байна" гэх мэдэгдлийг гаргасан.

Тэгвэл энэ нь худал мэдэгдэл байсан бөгөөд шатахууны хомсдол үүссэн нь үнэн болох нь илчлэгджээ. Тодотговол, "Сод монгол групп" ХХК-ийн гүйцэтгэх захирлын аравдугаар сарын тавны өдрийн тушаал олон нийтэд ил болов. 

Тус албан бичигт "ОХУ-ын "Роснефть" компаниас ачигдах АИ-92 шатахууны ачилтууд хязгаарлагдан багасч, АИ 92ын нөөц хангалтгүй болж багасах болж байгаа. Тиймээс аравдугаар сарын 6-ны өдрөөс АИ92 бензиныг УБНХБ-аас өдрийн 150 мянган литрийн хэмжээнд барьж, ачилтыг шатахуун түгээх станцуудад нийлүүлж байхыг УБНХБ-ын дарга Р.Баярмаад үүрэг болгосон байна. 

Тэгэхээр шатахууны хомсдол дахин үүсэж байгаа нь үнэн бололтой. Гэтэл харьяа байгууллагууд нь шатахуун импортлогч компанитайгаа үгсэн хуйвилдаж, ард иргэдээ хуурч байгаа болж таарах нь. Даравч далдайна гэдэг. Хариуцлагаас зугтах гэж ард түмэнд худал мэдээлэл түгээж байгаа ч цаг хугацааны эрхэнд үнэнтэй нүүр тулах нь дамжиггүй шүү дээ Г.Ёндон сайд аа.   

Б.Баатар