МУИС-ийн Хууль зүйн сургуулийн багш Д.Гангабаатарыг Үндсэн хуулийн цэцийн гишүүнээс томилсон. Тэгвэл Үндсэн хуулийн шинэхэн гишүүн Д.Гангабаатарт УИХ-ын гишүүд юу захив гэдгийг онцолж байна. 

УИХ-ын гишүүн Б.Энхбаяр: Би Д.Гангабаатарыг дэмжиж байгаа. Үндсэн хуулийн цэцийн гишүүнд ганцхан дарга бий. Тэр нь Үндсэн хууль. Шүүхийн тухай хуульд Үндсэн хуулийн цэцийн гишүүнд Улсын дээд шүүх нэр дэвшүүлэхдээ дарга нь ганцаараа ч юм уу оруулж ирэх тэр боломжийг хаасан. Өөрөөр хэлбэл, шүүх дэх улс төрийн, Ерөнхийлөгчийн нөлөөг хаасан юм. Үүнийг яаж шийдсэн гэхээр Үндсэн хууийн цэцийн гишүүнд нэр дэвшүүлэхдээ нийт шүүгчдийн саналаар шийднэ. Саналыг нууцаар авна гэж оруулж өгсөн. Д.Гангабаатар багш бол аль нэг намд элсэж, ажиллаж байгаагүй. Цэвэр мэргэжлийн судлаач багш орж ирлээ гэж дэмжиж байгаа.

УИХ-ын гишүүн Ш.Адьшаа: Цэцийн томилгоотой холбоотой зарим нэг зүйлд байр сууриа илэрхийлье. Өнгөрсөн долоо хоногт Хууль зүйн байнгын хороо Цэцийн шийдвэрт дүгнэлт гаргах талаар ярьсанд харамсаж байна. Энэ нь Үндсэн хууль зөрчиж хямралд оруулах нь. Улс төр, хуулийн өндөр боловсролтой шалгуур хангасан нэр дэвшигч байна. Мөн шударга ёсны дуу хоолой болсон О.Дашбалбар агсаны хүү. Аавынхаа хүсч мөрөөдөж байсан үйлсийг цаашид авч явж чадна гэж найдаж байна. 

УИХ-ын гишүүн Ц.Туваан: Монголчууд төрөө дээдэлдэг ард түмэн. Үндсэн хуулиа эцэг хууль гэж, түүний Цэийн шийдврт хүндэтгэлтэй ханддаг байсан. Гэвч сүүлийн үед гаргасан шийдвэрүүд нь Цэцийн нэр хүндийг ард түмний өмнө унагасан. Тэнд томилогдон очсон гишүүд ёс зүйгүй алдаатай шийдвэр гаргасан гэж боддог. Та томилогдож очоод нэр хүндийг нь өргөж амжилттай ажиллана гэж итгэж байна. Асуудалд улс төр, намын байр сууринаас биш хуулийг дээдэлж, хараат бусаар ажиллаарай гэж захья. 

УИХ-ын гишүүн Т.Доржханд: Үндсэн хуулийн цэцэд ямар их зөрчил байдаг. УИХ-ын гишүүд тэтгэвэртээ гарахаараа тэнд очдог. Мөн хоёр талдаа гараад чулуу шидэлцдэг гэдгийг өөрийн биеэр мэдэрсэн. 20-иод жилийн туршлагатай маш сайн хуульчийг оруулж ирж байгаад баяртай байна. Д.Гангабаатарын ажлын туршлага үнэхээр сайн байна. Ийм байдлаар өөрчлөгдвөл Үндсэн хуулийн цэцэд гэрэл гэгээ ажиглагдаж байна. Тиймээс энэ томилгоог дэмжиж байгаа. Үе үеийн Үндсэн хуулийн цэцийн гишүүд үргэлж дарга, албан тушаалтнуудад үйлчилж байсан гэдэг хувь хүний бодол бий. 

УИХ-ын гишүүн Н.Алтанхуяг: Үндсэн хуультай холбоотой тодорхой гурван асуудалд хувийн байр суурийг нь сонирхож байна. Залуу хүн байна. Томилогдоод очвол шударга л ажиллаарай гэж захимаар байна. Уг нь Цэцийн дээр хөх тэнгэр байдаг гэдэг байсан бол одоо хэдэн дарга нар л байдаг болсон шүү. Намтар түүхээр нь хүнийг дүгнэлтэй биш. Гэхдээ танд итгэж байна. 

УИХ-ын гишүүн Ж.Батсуурь: Д.Гангабаатар, Үндсэн хуулийн биш дарга нарын манаач болсон газар очиж байгаагаа санаарай. 1992 Ардчилсан Үндсэн хууль батлагдсанаас хойш Үндсэн хуулийн Цэц гэдэг байгууллагыг гаргаж өнөөдрийг хүртэл нэр төртэй үйл ажиллагаагаа явуулсаар ирсэн. Үндсэн хуулийн дээр хөх тэнгэр л бий гэх хүртэл шударга ёсны төлөө ажиллаж байсан цаг хугацаа бий. Гэвч одоо бол хүнд нөхцөл байдалд нутгийн дүү нэр дэвшиж очиж байгаад талархаж байна. Олон шүүгчдээс шалгарч очиж байгаад баяр хүргэе. Очиж буй нөхцөл байдал бол маш хүнд байгаа шүү. Үндсэн хуулийн Цэц нэр хүндээ Монгол Улсад төдийгүй олон улсад унагаасан. Ажлын хэсэг болж нөхцөл байдалтай танилцахаар очиход Үндсэн хуулийн манаач биш дарга нарын манаач болсон байсан. Ийм газарт очиж байгаа шүү. Үндсэн хуулийн Цэцийг би Үндсэн хуулийн шүүх гэж бодож байгаа. Шүүх хуралдаан болж байхад хурлаа хаяад явдаг шүүх шийдвэр гарсан байхад оролцогчийг хасдаг, өөрсдийн хүнээ авчирдаг. Хууль бус олон шийдвэрээс нь шалтгаалан Монгол Улс Ардчилсан орон гэдэг нэрээ олон улсад алдсан. Үндсэн хуулийг чин сэтгэлээсээ сахиж ажиллахыг хүсэж байна. 

УИХ-ын гишүүн Н.Ганибал: Нэр дэвшигч Дашбалбарын Гангабаатарыг дэмжиж байна. Сүхбаатарчуудын бахархал болсон хүний хүүхэд Ш.Цогтоо гишүүний орыг залгаж байгаад баяртай байна. Тал нутгийнхан зарчимч, шударга, ёс журмаа дээдэлдэг хүмүүс. Цэц сүүлийн нэг жилийн хугацаанд үнэхээр ёс суртахуунгүй, гаргаж байгаа шийдвэр нь улс төрийн захиалгатай болоод байсан. Нэр дэвших хүнгүй болчих вий гэсэн болгоомжлол байсан гэж Энхбаяр гишүүн хэлж байна. Нэр дэвшигчгүй болтлоо хуулийн салбар ялзарч байна. Үүнийг давж чадах хүн Сүхбаатараас сонгогдож байгаад талархаж байна.