ОХУ-аас Монгол Улсад суугаа ЭСЯ-ны зөвлөх, ОХУ-ын Холбооны  Россотрудничество агентлагийн Монгол Улс дахь төлөөлөгчийн газрын тэргүүн  Амгалан Ринчинович Базархандаев болон Россотрудничество төлөөлөгчийн газрынхан энэ сарын 7-10-нд Өвөрхангай аймагт ажиллаж байна. Орос-Монголын дипломат харилцаа үүсч хөгжсөний 100 жилийн ой тохиож буй 2021 онд тус аймгийн удирдлагын санаачилгаар  Хархорин сумын  Ерөнхий боловсролын "Орхон" дунд сургуульд Улаанбаатар дахь "Русский Дом"-ын дэргэдэх Орос хэл судлалын 38 дахь төвийг нээлээ. ОШУСТ-ийн зүгээс Орхон сургуульд байгуулагдаж буй Орос хэлний төвд зургаан сая төгрөгийн үнэ бүхий оросын сонгодог утга зохиолын дээжис, орос хэлний сурах болон заах арга зүйн ном, гарын авлага зэргийг бэлэглэлээ. Хархорин суманд нээгдэж буй төв нь шинжлэх ухаан, боловсрол, соёлын чиглэлээр хамтын ажиллагаа хөгжүүлж өөрийн үйл ажиллагаагаар дамжуулан монгол иргэдэд орос хэл, оросын соёлыг түгээн дэлгэрүүлэхээс гадна жил бүр Оросын Засгийн газраас зарлагддаг их, дээд сургуулийн тэтгэлэгт хөтөлбөрт хамрагдах боломжийг сумын иргэдэд нээлттэй, хүртээлтэй болгох гүүр болон ажиллах  юм байна.

Б.Жаргал