Нийслэлийн СХД-ийн  28 дугаар тойрог, Хэнтий аймгийн 18 дугаар тойргийн  нөхөн сонгуулийн санал хураалт өнөөдөр өглөө 07:00 цагт эхэллээ. УИХ-ын сонгуулийн 18 дугаар тойргийн сонгогчдын нэрийн жагсаалтад нийт 51495 сонгогч, 28 дугаар тойрогт 122974 сонгогч бүртгэгдсэн байна. 

Өчигдөр 09:00-20:00 цагийн хооронд зөөврийн битүүмжилсэн хайрцгаар санал хураах үйл явцыг эрүүл мэнд, онцгой байдал, цагдаагийн байгууллагын алба хаагчид, ажилтнуудтай  хамтран зохион байгуулж, “улаан бүс” буюу эмнэлэг, гэрийн тусгаарлалтад байгаа сонгогчийн саналыг авсан байна. Зөөврийн битүүмжилсэн саналын хайрцгаар саналаа өгөхөөр 2861 сонгогч хүсэлт ирүүлснээс 84.73 хувь нь буюу 2424 сонгогч саналаа өгсөн байна. 

Улсын Их Хурлын сонгуулийн 18 дугаар тойргийн /Хэнтий аймаг/, 28 дугаар тойргийн /нийслэлийн Сонгинохайрхан дүүргийн 7, 8, 9, 10, 11, 12, 13, 14, 15, 16, 17, 18, 19, 21, 23, 25, 27, 28, 29, 30, 31, 38, 39, 40, 42, 43 дугаар хороо/ сонгогч таныг сонгуульдаа идэвхтэй оролцож, саналаа өгөхийг Сонгуулийн ерөнхий хорооноос уриаллаа.