Нийслэлийн Сонгинохайрхан дүүргийн 28 дугаар тойрог, Хэнтий аймгийн 18 дугаар тойргийн нөхөн сонгуулийн санал хураалт өнөөдөр болж байгаа. Сонгуулийн ерөнхий хороо сонгуулийн ирцийн мэдээллийг 13:00, 17:00, 21:00 цагт өгч байхаар болсон. Тэгвэл 13:00 цагийн байдлаарх ирцийн мэдээг хүргэлээ.
Сонгуулийн ерөнхий хорооны Ажлын албаны дарга Д.Баяндүүрэн "Нөхөн сонгуулийн санал хураалтын үйл ажиллагаа үргэлжилж байна. Энэ удаагийн сонгууль цар тахлын халдвар тархсан амаргүй нөхцөл байдалд явагдаж байна. Мөн өчигдөр Хэнтий аймагт цастай, шуургатай цаг агаарын амаргүй нөхцөл байдалтай байлаа. Үүний улмаас Хэнтий аймгийн дөрвөн суманд цахилгаан тасарсан.
Өчигдөр буюу аравдугаар сарын 9-ны өдөр зөөврийн хайрцгаар санал авах ажиллагаа явагдсан. Хэнтий аймагт 178 чиглэлд 1164 сонгогч зөөврийн хайрцгаар саналаа өгсөн бол Сонгинохайрхан дүүрэгт 114 чиглэлд 1260 сонгогч зөөврийн хайрцгаар санал өгсөн. Зөөврийн хайрцгаар санал авах үед тухай сонгогч тусгаарлалтын байрнаасаа гарсан, хаяг дээрээ байхгүй зэрэг нөхцөл байдал үүсэж байсан.
Өнөөдрийн 12:00 цагийн байдлаар 18 дугаар тойргийн сонгогчдын нэрийн жагсаалтад бүртгэгдсэн 5575 сонгогч буюу 10.1 хувь нь саналаа өгөөд байна. Харин 28 дугаар тойргийн 14857 сонгогч буюу 13 хувь нь саналаа өгсөн байна. Бүх хэсгүүд дээр санал авах ажиллагаа хэвийн зохион байгуулагдаж байна" гэлээ.
СЕХ-ны Хууль эрх зүйн хэлтсийн дарга Д.Бат-Эрдэнэ "Иргэд сонгогчдын нэрийн жагсаалтад бүртгэгдсэн үү үгүй юу, хаяг дээр нь өөр сонгогч байна уу үгүй юу гэдгийг Улсын бүртгэлийн ерөнхий газрын цахим хуудсаас шалгаад, нягтлах асуудал гарвал цахим хуудсаар нь тухайн байгууллагад хандах боломжтой. Мөн хэсгийн хороодод ажиллаж байгаа бүртгэлийн ажилтанд хандаж, асуудлаа шийдвэрлүүлэх боломжтой.
ЦЕГ-аас авсан мэдээллээр сонгуулийн сурталчилгааны 21 хоногийн хугацаанд Сонгуулийн тухай хууль, тогтоомж зөрчсөн асуудлаар 46 гомдол мэдээллийг хүлээн авсан байна. Гомдлын ихэнх нь зурагт самбар эвдэлсэн, гэмтээсэн, алга болсон гэдэг зөрчлийн мэдээллүүд байгаа. Одоогийн байдлаар СЕХ-нд санал хураалттай холбоотой гомдол, мэдээлэл ирээгүй байна" гэв.
Ташрамд өгүүлэхэд Улсын их хурлын сонгуулийн тухай хуулийн дагуу сонгуулийн ирц 50 хувиас дээш гарахгүй бол долоо хоногийн дотор нэмэлт санал хураалт явуулах юм байна.
