Сонгуулийн ерөнхий хорооноос нөхөн сонгуулийн санал хураалтын ирцийн мэдээллийг танилцууллаа. 

Сонгуулийн ерөнхий хорооны дарга П.Дэлгэрнаран "Нөхөн сонгуулийн санал хураалт өглөө 07 цагт эхэлсэн. Одоо санал хураалт дуусахад нэг цагийн хугацаа үлдээд байна. Нөхөн сонгуулийн санал хураалтын ирц хангалтгүй байна. Энэ нь олон талын шалтгаантай байна. Хэнтий аймагт цаг агаарын нөхцөл байдал хүнд байгаагаас шалтгаалж ирц хангалтгүй байна. Тодруулбал хэд хэдэн суманд цас орсноос болж жижиг машинтай хүмүүс хэсгийн хороонд хүрч чадахгүй нөхцөл үүссэн, намрын хадлан, ургац хураалтын ажилтай холбоотой ирцэд сөргөөр нөлөөлж байна. 

21:00 цагийн байдлаар Хэнтий аймагт 31.79, Сонгинохайрхан дүүрэгт 34.1 хувьтай байна. Гэхдээ энэ ирц бол 20 цагийн мэдээ. Сонгогчдын ирцийг нэмэгдүүлэх талаар анхаарч ажиллаж байгаа. Сонгинохайрхан дүүрэгт сонгогчдын ирц нэмэгдэх хандлагатай байгаа. Харин Хэнтий аймагт ирц нэмэгдэх хандлага ажиглагдахгүй байна. 

Өнөөдөр санал хураалттай холбоотой өргөдөл, гомдол ирээгүй. Харин өчигдөр сонгуулийн сурталчилгаатай холбоотой зөрчлийн шинжтэй гомдлыг ирүүлсэн. Гомдлыг шалгаж, цагдаагийн байгууллагад шилжүүлээд байна" гэв. 

Мөн тэрбээр энэ удаагийн нөхөн сонгуулийн зардал 2.2 тэрбум төгрөг байгаа бөгөөд ирц 50 хувьд хүрэхгүй бол дахин санал хураалт болно. Тойргоороо ирц хүрэхгүй бол тухайн хэсгийн хороодод долоо хоногийн дотор дахин санал хураалтыг явуулна гэдгийг онцоллоо. 

Б.Баатар