Нийслэлийн Сонгинохайрхан дүүргийн 28 дугаар тойрог, Хэнтий аймгийн 18 дугаар тойргийн  нөхөн сонгуулийн санал хураалт явагдаж дууслаа. Санал хураалт өнөөдөр өглөө 07:00 цагт эхэлсэн бөгөөд 22 цагт хаагдав.

Сонгуулийн ерөнхий хорооны дарга П.Дэлгэрнаран "Нөхөн сонгуулийн 148 хэсгийн хороо хаалгаа барьж, санал хураалт хаагдсан" гэдгийг мэдээлэв. 

Санал хураалт дуусахад сонгогчдын ирц Сонгинохайрхан дүүрэг 39.61, Хэнтий аймгийн ирц 37.04 хувьтай байлаа. Ийнхүү тойргуудад сонгогчдын ирц хүрээгүй учир дахин санал хураалт явагдахаар болоод байна. Ирц хүрээгүй хэсгүүдэд нэмэлт санал хураалтыг долоо хоногийн дотор зохион байгуулах хуулийн заалттай аж. 

УИХ-ын сонгуулийн 18 дугаар тойргийн сонгогчдын нэрийн жагсаалтад нийт 51495 сонгогч, 28 дугаар тойрогт 122974 сонгогч бүртгэгдсэн байна. 

Б.Баатар