Сонгуулийн ерөнхий хорооноос нөхөн сонгуулийн нэмэлт санал хураалтын талаар мэдээлэл хийлээ.
Сонгинохайрхан дүүргийн 28 дугаар тойрог, Хэнтий аймгийн 18 дугаар тойрогт явагдсан нөхөн сонгуулийн нийт төсөв нь 2.2 тэрбум төгрөг. Үүнээс СЕХ-ны төсөв нь 1.8 тэрбум. Үлдсэн мөнгө нь Улсын бүртгэлийн байгууллага болон цагдаагийн байгууллагын төсөв байдаг аж.
Тэгвэл нөхөн сонгуулийн нэмэлт санал хураалтыг үлдсэн төсөвтөө багтааж явуулахаар болсон гэдгийг СЕХ-ны дарга П.Дэлгэрнаран мэдэгдлээ. Тэрбээр "Сонгуулийн санал хураалтын зардал талдаа ороод зогсчихлоо гэж ойлгож болно. Тиймээс үлдсэн зардалдаа багтаагаад нэмэлт санал хураалтыг явуулна гэсэн шийдвэрийг СЕХ-ны хурлаар гаргалаа.
УИХ-ын сонгуулийн тухай хуулиар сонгуулийн эхний санал хураалтын ирц 50 нэмэх нь нэг гэсэн босготой. Харин нэмэлт санал хураалтаар ирцийн босго байхгүй. Энэ бол эцсийн санал хураалт гэсэн үг учир шууд дүнгээ гаргана. Сурталчилгаа хийхгүй. Нэмэлт санал хураалтад сонгогчдын идэвхийг нэмэгдүүлэх талаар ажиллах болно" гэв.
Б.Баатар
