ХӨСҮТ-д 1986 оноос хойш урсгал засвар хийгдээгүй, нурж унахад бэлэн болсон байгаа талаарх асуудлыг УИХ-ын гишүүн С.Одонтуяа өнгөрсөн долоо хоногт хөндсөн. Тэгвэл ХӨСҮТ болон ХСҮТ эмнэлгийн асуудлыг цогцоор нь шийдвэрлэхээр судалж байгаа талаар Сангийн сайд Б.Жавхлан хэллээ.

Тэрбээр энэ талаар “ХӨСҮТ-ийн нөхцөл байдал үнэхээр сэтгэл эмзэглэмээр юм байна лээ. Би өөрөө ковид-19 тусаад хэвтсэн. Ирэх жилүүдийн төсвийн хөрөнгө оруулалт дээр ХӨСҮТ, ХСҮТ зэрэг эмнэлгүүдэд онцгой анхаарна. Дорвитой юм хийе гэж бодож байгаа.

Төсвийн хөрөнгө оруулалтаар хийж барахгүй байж магадгүй.

Хажуугаар нь 100 гаруй сая ам.долларын бүтээн байгуулалт хийж байж энэ асуудлыг шийдэх юм байна лээ. Тиймээс ийм хэмжээний хөрөнгө оруулалтыг төсөв дээр авч эрсдэл учруулаад түүнийгээ санхүүжүүлж чадахгүй хэдэн жил явснаас гаднын зээл тусламж эсвэл шууд тусламжаар нэг мөр шийднэ гэж судалж байгаа" гэв.

А.Сүх