Өнөөдөр Олон улсын охидын эрхийг хамгаалах өдөр тохиож байна. Энэ өдрийг угтан төрийн бус байгууллагуудаас мэдээлэл хийлээ.

Энэ үеэр өмгөөлөгч Р.Булгамаа “Өдрөөс өдөрт аймшигтай, анхаарал татсан гэмт хэргүүд дараалан гарах боллоо. Ноцтой гэмт хэрэг гарах бүрд бид нийгмээрээ шуугиад л хэсэг хугацааны дараа мартчихдаг дүр төрх нийтлэг болж байгаад цэг тавих цаг ирсэн.

Хүчирхийлэлд өртсөн охид амь нас, эрүүл мэндээрээ хохирч, ирээдүйд итгэх итгэлээ алдаж байна. Бараг өдөр бүр бидний энхрийлэн ургуулсан цэцэг шиг охид бусдын гарт, бусдын эрхшээлд автан бие махбод, сэтгэл санаагаараа хохирч байгааг бид зүгээр харсаар, хүлээн зөвшөөрсөөр байж болохгүй.

Тухайлбал, 2017 онд 137, 2018 онд 309, 2019 онд 350, 2020 онд 328 охин бэлгийн хүчирхийлэлд өртсөн байна.

Харин он гарсаар эхний найман сарын байдлаар 228 охин бэлгийн халдашгүй дархан байдлын эсрэг гэмт хэргийн хохирогч болоод байна.

Хохирогч охидын сэтгэл санаанд учирсан гэмтлийн зэргийг тогтоодог, гэмтлийг эмчлэхэд хэр хугацаа, хэр зардал орохыг тооцдог зохицуулалт буюу сэтгэл санааны хохирлыг тооцон олгох журамыг шинэчилж, батлан ажил хэрэг болгохыг хууль тогтоогчдоос хүсэж байна.

Гэмт хэрэгтнүүд хорих ялаас огтхон ч эмээхгүйгээр ийм гэмт хэргийг үйлдсээр байгааг анхаарах ёстой. Ийм гэмт хэрэг сүүлдээ ураг төрлийн буюу ахуйн шинж чанартай болж байгаа нь хамгийн айдас дагуулсан асуудал. Хүүхэдтэй бэлгийн харьцаанд орсон бол торгууль төлнө гэсэн санкцийг хуульд одоо хүртэл байлгаад байгаа УИХ-ын гишүүдээс ичиж байна. Хүүхдээ хайрлаж, энэрэх төрийн бодлого үнэхээр алга” гэлээ.

А.Сүх