“Долдугаар сарын 1”-ний хэрэгт буруутгагдаад буй цагдаагийн экс дарга нар одоо ШШГЕГ-ын харьяа цагдан хорих 461 дүгээр ангийн эмнэлэгт хоригдож буй. Генерал Ч.Амарболд, хурандаа О.Зоригт, Ш.Батсүх нар гурвуулаа сахарын өвчтэй тул бие нь тааруу байгаа юм. Анхан шатны шүүхээс тэдэнд 2.6-3.6 жилийн хорих ял оноож, давж заалдсан ч давж заалдах шатны шүүхээс тэдний ялыг хэвээр баталсан. Тиймээс тэд хяналтын шатны шүүх буюу Улсын дээд шүүхэд хандахаа мэдэгдээд буй.
   
    Давж заалдах шатны шүүх хуралд энэ сарын 20-нд болсон. Тэгэхээр хуулиндаа 10 хоногийн дотор ялын тогтоолыг шүүгдэгчдэд гардуулах ёстой. Энэ дагуу тэдний ялын тогтоолыг ирэх даваа гаригт гардуулж, цагдаагийн экс удирдлагуудын өмгөөлөгчид хяналтын шатны шүүхэд өргөдлөө хүргүүлэхээр болжээ. Харин өргөдөл өгснөөс 30 хоногийн дотор хурлыг товыг товлож, гомдлыг хэлэлцэнэ. Гэвч “Энэ хэрэгт угаасаа захиалгатай учраас хяналтын шатны шүүхийн шийдвэр бидний талд гарна гэдэгт итгэхгүй байна. Дээд шүүхээс хэвээр баталвал тэгээд ялаа эдэлдэг байх даа. Үнэхээр хэцүү байна. Биеийн байдал нь ч тун тааруу байгаа” хэмээн тэдний ар гэрийнхэн ярилаа.    
    Анхан шатны шүүх хурлын өмнө буюу өнгөрсөн тавдугаар сард Ч.Амарболд генерал хорт хавдар боолгох хагалгаанд, харин О.Зоригт хурандаа зүрхний хагалгаанд орсон. Гэвч тэдний хагалгааны оёо ч аниагүй байхад Сүхбаатар дүүргийн шүүхийн Тамгын газраас амь насыг нь хариуцна хэмээн Ч.Амарболдыг дамнуургатай нь, О.Зоригтыг тэргэнцэртэй нь цагдан хорих ангийн шүүхийн танхим руу авч явж, шүүх хуралдаанд оролцуулж ял оноож байсан юм.
   
    Харин одоо Ч.Амарболд генералын нэг нүд юм харахаа байж эхэлжээ. Энэ талаар түүний төрсөн ах Ч.Энхболд “Ч.Амарболдын бие их тааруу байгаа. Нэг бөөр нь бүр хатангиршсан байна. Бас нэг нүд нь юм харахаа байж эхэлсэн. Юутай ч цагдан хорихын эмнэлэгт хэвтэж байгаа. Тэнд нь эмчилгээ хийж байгаа байх. Эмч нарын зүгээс сэтгэл санаагаар их унасан байна. Тайван байвал бие нь сайжрахад жаахан ч гэсэн нөлөөлнө гэж байгаа ч тэдний сэтгэл санаа дээрдэхгүй байна” гэлээ.
   
    Харин О.Зоригт хурандаагийн хувьд хоригдож байх хугацаандаа дахин зүрхний хагалгаанд орсон бие нь тааруухан байгаа аж. Тиймээс Нийслэлийн шүүхийн Ерөнхий шүүгч Б.Сарантуяад улсын эмнэлэгт хэвтүүлж эмчлүүлье гэсэн хүсэлт гаргасан ч татгалзсан хариу өгчээ. Яг ямар шалтгаанаар татгалзсанаа тайлбарлаагүй байна.
   
    Мөн цагдаагийн экс удирдлагуудтай өмгөөлөгч болон эхнэрээс нь өөр хүн уулзахыг зөвшөөрөхгүй байгаа юм байна.