Ирэх оны төсөвт шинээр хоёр яам байгуулахаар тусгасан. Үүний нэг нь Цахим хөгжил, харилцаа холбооны яам юм. Уг яамыг Ерөнхий сайдын дэргэдэх Харилцаа холбоо, мэдээллийн технологийн газрын дарга Б.Болор-Эрдэнэд хариуцуулах сурагтай.

Тэрбээр одоогийн албан тушаалдаа томилогдоод удалгүй "Цахим үндэстэн" нэр дор улс даяар мөрдөгдөж буй хязгаарлалтын арга хэмжээг зөрчиж, гурав хоног дараалан олон нийтийг хамарсан "шоу" хийсэн нь олныг бухимдуулаад буй.

Учир нь дэлхий нийтэд тархаад буй коронавирусний халдвар оргил үедээ хүрээд буй гэх мэдээллийг Эрүүл мэндийн яамнаас өгч буй бөгөөд үүний гол шалтгаан нь уг арга хэмжээтэй холбоотой хэмээн зарим иргэд үзэж буйгаа цахим хуудсаараа дамжуулан илэрхийлээд байгаа юм.

Тэгээд ч Засгийн газрын байр суурь дэнчигнэж, хэдэн сайдаараа "туг тахиж" галыг дарах дээрээ тулаад байгаа энэ үед олны дургүйцлийг өдөөсөн сайд томилох нь "дайран дээр давс" гэгч болно уу гэхээс тус болохгүй гэдгийг Ерөнхий сайд ч мэдэж баймаар.

Дээр нь халдварт өвчний эсрэг ажиллаж байгаа хэдэн байгууллагаа хүртэл "муухай" харагдуулаад авсан. Юу гэвэл, нийслэл нь татгалзсан арга хэмжээг Улсын онцгой комисс нь зөвшөөрч хоорондоо ямар ч уялдаа холбоогүй ажилладаг гэдгээ харуулсан. Ер нь гаргасан шийдвэрээ өөрсдөө үгүйсгэдэг гээд иргэд их л бухимдалтай байгаа шүү дээ, сайд аа.

Б.Лхам