УИХ-ын чуулганы пүрэв гарагийн нэгдсэн хуралдаанаар Монгол Улс, Азийн дэд бүтцийн хөрөнгө оруулалтын банк хоорондын зээлийн хэлэлцээр /КОВИД-19-ийн эсрэг вакцинжуулалтын арга хэмжээ/ -ийн төслийг соёрхон батлах тухай хуулийн төслийг хэлэлцэж байна. 

Н.Алтанхуяг: Иргэдийн итгэлийг хүлээж сууснаас хойш нэг жилийн хугацаанд бидний тавьсан өр нэг тэрбум ам.долларт хүрч байгаа шүү. Хөнгөлөлттэй нөхцөлтэй, хүү нь бага, удаан хугацаанд төлнө гэж байгаа ч авч байгаа мөнгөө гамтай зарцуулмаар байна. Иргэд яах гэж биднийг сонгосон юм. Татвар төлөгчдийн мөнгө хөрөнгөн дээр сайн хяналт тавьж, хэрэгтэй хэрэггүй зүйл дээр битгий мөнгө үр гэж явуулсан. Даанч хангалттай хэмжээнд гамнаж, хяналт тавьж чадахгүй байна. 

Ер нь хаанахын вакциныг хэдий хэр хэмжээгээр, хэдэн төгрөгөөр худалдаж авах талаар бодлогыг хэн гаргаад байгаа юм. Одоо хэдий хэмжээний вакцин худалдаж авахаар төлөвлөж байгаа юм. 

Хоёрдугаарт, эмийн асуудлаа тодорхой болгож өгөхгүй юм уу. Иргэд бараг таамгаар шахуу эм авч ууж эдгэх нь эдгээхд, үхэх нь үхэж байна. Та нар "арбидол" гэдэг юм болдоггүй юм байна. Үүний оронд өөр эм авах ёстой гээд.

Эмийн компаниудын лобби, хэдэн төгрөг дээр иргэдийнхээ амь насыг гаргуунд нь хаяж болмооргүй байна. 

Энгийн зүйл дээр иргэдээ бодохгүй, мөнгө төгрөг л ярих юм. Ковид-оор айлгаад өчнөөн зээл авлаа. Иргэдийнхээ эрүүл мэнд тал дээр жаахан анхаарч болдоггүй юм уу. Энэ эм болохгүй, энэ эм олон улсад хүлээн зөвшөөрөгдөөд байна. Ийм бэлтгэлтэй байгаарай гээд хэлчихэд л бүх хүн тайвшраад явчихна шүү дээ. Хоёр жил шахам сурталчилгаа хийгээд яг байлдах болсон байхгүй. 

Эрүүл мэндийн сайд С.Энхболд: Вакцин төлөвлөлтийг эрүүл мэндийн яам  мэргэжлийн байгууллагтайгаа хамтран гаргадаг. Хоёр тун вакцин хийхэд 4.130.000 вакцин шаардлагатай. Мөн гурав дахь тун төлөвлөлтийн дагуу явагдаж байна. Худалдан авалтаа төлөвлөлтийн дагуу хийж Засгийн газраар батлуулдаг.

Өнөөдрийн байдлаар 1.7 сая тун Файзер, 890 мянган тун Вероселл вакцин нөөцөнд бий. 

"Арбидол" эмийг сая өвөрмөц эмийн хэрэглээнээс хассанаас биш ерөнхий буюу вирусний эсрэг эмийн хүрээнд бий. 

Б.Лхам