Монгол Улсын Ерөнхийлөгчийн ивээл дор Шүүх эрх мэдэл, хууль сахиулах алба хаагчдын үндэсний чуулган Төрийн ордонд эхэллээ. Энэ үеэр УИХ-ын дэд дарга Т.Аюурсайхан үг хэллээ.

Тэрбээр "Хүний эрх, эрх чөлөө, шударга ёсгы дээдэлсэн хүмүүнлэг, иргэний ардчилсан нийгмийн цоглоон хөгжүүлэх эрхэм зорилгын төлөөх өнгөрсөн 30 жилийн туршлага, сургамжаа цэгнэн дүгнэж, ирээдүйн зам мөрөө шинээр тодорхойлох эрс шинэчлэлийн эрмэлзэл эрчимтэй өрнөж байна.

Энэ хүрээнд УИХ Үндсэн хуульд нэмэлт, өөрчлөлт оруулсан. Бие даасан, хараат бус ёс зүйтэй шүүхийн тогтолцоог бүрдүүлэх шинэ зарчмыг хуульдаа тусгасны дагуу шүүхийн шинэтгэлийг эхлүүлээд байна. 

Монгол Улсын төр засгаас дэвшүүлсэн эдгээр шинэчлэлийн хүрээнд хууль сахиулагчид та бүхэн хүний эрх, шударга ёс, хуулийн засаглал уриан дор хуран чуулж байгаа нь нэн талархалтай.

УИХ-аас шүүх, хууль сахиулах байгууллагын эрх зүйн орчныг шинэчлэн боловсронгуй болгох ажлыг шат дараатай хэрэгжүүлж байгаа бөгөөд Авлигатай тэмцэх үндэсний хөтөлбөрийг 2016 онд, Цагдаагийн албаны тухай хууль болон Прокурорын тухай хуулийг 2017 онд, Өмгөөллийн тухай хуулийг 2019 онд, Шүүхийн тухай хуулийг 2021 онд шинэчлэн баталлаа.

Харин намрын чуулганаар Хуульчийн эрх зүйн байдлын тухай хуулийг шинэчлэн батална. Хууль сахиулагчид өөрсдөө хуулиа зөрчдөг, иргэндээ хүнлэг бус ханддаг, эрүү шүүлт тулгадаг, хэрэг наймаалцдаг зэрэг асуудлыг өнөөдрийн энэ чуулганаас эхлэн халах ёстой.

Хуулиа шударга сахиулж, ёс зүйтэй ажиллахыг хатуу шаардана.

Иргэд шүүхээс, прокурор, цагдаагаас эмээдэг, үзэн яддаг биш найрсаг, энэрэн өмгөөлөл эрдэг, шударга ёсны дархлаа тэнд бий гэж итгэдэг сайхан нийгмийн төлөө хамтдаа зүтгэцгээе" гэлээ.

А.Сүх