Монгол Улсын Их Хурлын тухай хуульд зааснаар наймаас доошгүй суудал бүхий нам бүлэг байгуулж болно гэж заасан байдаг. Энэ дагуу 2020 оны УИХ-ын сонгуулиар АН 11 суудал авч бүлэг байгуулах эрхээ авсан юм. Гэвч УИХ дахь АН-ын бүлгийн дарга Д.Ганбат намаасаа дахин хоёр гишүүн хасаж, найман хүнтэй үлдэж буйгаа зарлалаа. Ингэснээр АН-ын бүлгээс нэг л гишүүн саналаараа гарахад бүлэг задрах хэмжээнд хүрээд байна.  

Д.Ганбатын намынхаа гишүүдийг хасах болсон шалтгаан нь хоёр долоо хоногийн өмнө болсон бүлгийн хуралдааны үеэр гишүүд нь түүнийг намаа зөв зохион байгуулалтад оруулж, сөрөг хүчний үүргээ гүйцэтгэж чадахгүй байгаа талаар шүүмжилж цаашид итгэл үзүүлэх эсэхийг хэлэлцэнэ гэж тохиролцсонтой холбоотой гэж үзэж буй юм.

Улмаар уг үйл явдлаас хойш долоо хоногийн дараа С.Ганбаатар, Н.Алтанхуяг нарыг бүлгээсээ хасаж, Ц.Тувааныг тодорхой хугацаагаар намаас хөөх шийдвэрийг бүлгийн дарга гаргасан бол энэ долоо хоногт үргэлжлүүлэн УИХ-ын гишүүн Н.Ганибал, Ж.Батсуурь нарыг намаасаа хөөхөөр боллоо.

Тэр бүлэг доторх өөрийн эсрэг дуугардаг гишүүдээ хасаж, өөрийн байр сууриа ийн бататгаж буй бололтой. Учир нь бүлгээс хасагдсан болон намаас хөөгдсөн дээрх нэр бүхий хүмүүс бүлгийн хурал дээр Д.Ганбатыг хамгийн их шүүмжилсэн хүмүүс юм.

Б.Лхам