УИХ-ын гишүүн асан, дуучин С.Жавхлан нарын төв талбайд хийж байгаа суулт дөрөв дэх өдрөө үргэлжилж байна. Тэрбээр УИХ, Засгийн газрыг тарж, Ерөнхийлөгчийг ажлаа хийхийг шаардаж байгаа юм. 

Түүнийг суулт хийхтэй зэрэгцэн цахим сүлжээнд иргэд "захиалгатай" байж магадгүй гэж хардаад байгаа юм. Тэгвэл энэ талаар тэрбээр дараах тайлбарыг өглөө. “Намайг харлуулах гэсэн асар их юм явна. Троллууд хэлэх үггүй болсон байх гэж бодож байна. Гишүүн байхдаа энэ ажлуудаа сурталчилж, өөрийгөө дөвийлгөж ажиллаж чадаагүй бол түмэн олон, троллуудаас уучлал хүсэж байна. Бүх зүйлийг чаддаг, мэддэг юм шиг дүрс эсгэдэг хүн биш. Чадахынхаа хэрээр болгож бүтээх гэж л яваа залуу.

Би дуу дуулаад өөрөө амьдралаа аваад явчих чадалтай залуу. Малгайгаа таван жилийн өмнө өмсөж байсан. Үнэ нь 75 сая гээд Л.Мөнхбаясгалан сэтгүүлч сэвээд байна лээ. Чи ирээд ав. Би тэр 75 сая төгрөгөөр нь хоолгүй, түлээгүй байгаа иргэдэд хоол, түлшийг нь аваад өгье.

Миний өмсөж зүүж байгаа гадаад буюу өнгө хэлбэр хүмүүст их сонин байх шиг байна. Өөр харлуулах юм олдохгүй байхгүй юу. Гэтэл 100 мянган ам.долларын бугуйн цаг, 2.5 сая төгрөгийн архийг хэд хэдэн шилээр нь нэг орой уудаг хүмүүсийг дөрвөн жил сууж таньчихаад тэдгээртэй тэмцэж байна. Яагаад гарч ирэхгүй байна гэхээр С.Жавхлан бүгдийг мэдэж байгаа болохоор.

Миний сууж байгаа суулт гол цэг дээр нь дараад байгаа юм.

Миний хувьд том эрсдэл, зориг үүрч, асар том хорт хавдартай тэмцэж байгаа шүү.

Би дөрвөн жил парламентад тэмцэж байгаад гарч ирсэн. хэрвээ би гишүүнээр ажиллаж байхдаа кнопоо худалдсан бол авсан мөнгөө аль хэдийн гудамжаар гараад цацчихсан байгаа. Тийм зүйл байхгүй болохоор энэ хүмүүс айж байна" гэсэн тайлбар өглөө. 

А.Сүх