УИХ-ын Боловсрол, соёл, шинжлэх ухаан, спортын болон Төсвийн байнгын хорооны хамтарсан хуралдаан өнөөдөр боллоо.

Хуралдаанаар Боловсрол, соёл, шинжлэх ухаан, спортын салбарын 2021 онд төсвийн хөрөнгө оруулалтаар хийгдэх төсөл, арга хэмжээний худалдан авах ажиллагааны явц байдалтай танилцан шалгаж, санал, дүгнэлт гаргах, шийдвэрийн төсөл боловсруулах үүрэг бүхий Боловсрол, соёл, шинжлэх ухаан, спортын байнгын хороо болон Төсвийн байнгын хорооны хамтарсан ажлын хэсгийн тайланг сонсов. Энэ үеэр БШУ-ны сайдаас гишүүд асуулт асуусныг онцлон хүргэе.

П.Анужин: Таны хийсэн танилцуулагт ЕБС-ийн хоол үйлдвэрлэл, үйлчилгээний хэрэгжилтийн талаар нэлээд гарлаа. Гэхдээ энд байнгын хорооноос томилогдсон ажлын хэсэг гарч ажилласан юм шүү. Ажлын хэсэг төсвийн төсөөлөл хийхэд маш их үүрэг гүйцэтгэсэн. Энэ мөнгө БШУ-ны яам, УИХ хууль гаргаад л батлуулсан юм биш шүү. Юм үнэнээрээ сайхан.

Хүүхдүүдийн хоолыг хэдэн төгрөгөөр нэмэх нь ямар ач холбогдолтой вэ гэдгийг ойлгуулах гэж байнгын хорооноос гарсан ажлын хэсэг сайн ажилласны үр дүн, Засгийн газарт чиглэл өгсөн, байнгын хорооноос тогтоол гарсан. Ингэж байж хэрэгжсэн зүйл гэдгийг огт дурдахгүй байна.

Ямар ч байсан бид төсөвтөө суулгаж чадсан. Энэ бол бидний үр хүүхдийн ирээдүй шүү дээ. Энэ ажлын хэсэг цаашид ч ажиллах шаардлагатай. Гол тогооны асуудал, хоол зүйчгүй байна. Гэтэл хууль нь өөрчлөгдчихөөд байна. Эдгээрийг 2024 он хүртэл цогцоор нь үе шаттай шийдэх нь чухал.

Л.Энх-Амгалан: П.Анужин гишүүн болон түүгээр ахлуулсан ажлын хэсэг маш сайн ажилласан. Энэ хуулийн хэрэгжилтийг хангахад байнгын хорооноос ажлын хэсэг гаргаж ажилласнаар хүүхдийн хувьсах зардлыг нэмж чадсан. Олон аав ээжүүдийнхээ нэрийн өмнөөс энэ ажлын хэсгийн гишүүдэд гүн талархал илэрхийлье.

Гол тулгамдаж байгаа асуудал нь нийслэлд байна.

Орон нутаг 1500 төгрөгөөр дотуур байрны гал тогоо сайтай учраас чанартай хоол нийлүүлээд байж болоод байгаа юм. Харин нийслэлийн сургуулийн 70 орчим хувь нь түрээсийн гал тогоотой байна. Уг нь 1500 төгрөг тэр чигээрээ хүүхдүүдийн аманд орох ёстой ч түрээсийнх байгаа учраас сурагчдийн “Үдийн хоол”-той холбоотой гомдол гараад байгаа юм. юу ч байсан ирэх жил хоол зүйчтэй болох төсвийг шийдвэрлэсэн. Хоол үйлдвэрлэл дээр тодорхой дэвшил гарах байх гэж найдаж байна.

А.Сүх