МҮЭХ-оос цалин, тэтгэврийг 20 хувиар нэмэгдүүлэх саналыг дахин хүргүүлэхээ мэдэгдлээ.

МҮЭХ-ны ерөнхийлөгч Х.Амгаланбаатар “Монгол Улсын 2022 оны нэгдсэн төсвийн төсөл УИХ-аар хэлэлцэгдэж байна. Одоогоос гурван долоо хоногийн өмнө буюу есдүгээр сарын 30-ны өдөр МҮЭХ-оос ирэх оны төсөвт ямар асуудлыг санал болгож хүргүүлэв, ямар шаардлага, эх үүсвэр байгаа талаар олон нийтэд мэдээлэл хүргүүлж байсан.

Энэ 21 хоногийн хугацаанд тодорхой саналуудыг тооцоо, судалгаатай нь явуулсан ч төсвийн төсөлд МҮЭХ-оос явуулсан санал, шаардлагууд бүрхэг байна.

Тухайлбал, Хөдөлмөр, нийгмийн зөвшилцлийг хангах улсын гурван талт хэлэлцээр энэ оны тавдугаар сарын 2-ны өдөр байгуулагдсан Засгийн газрыг төлөөлж ХНХ-ын сайд, Сангийн дэд сайд болон бусад холбогдох яамдуудын Төрийн нарийн бичгийн дарга нар оролцож зөвшилцөлд гарын үсэг зурсан. Уг хэлэлцээр бол хуулийн дагуу хэрэгжих ёстой баримт бичиг.

Ингэхдээ цалин, тэтгэвэр тэтгэмжийг үе шаттайгаар 20 доошгүй хувиар нэмэх гэж тусгасан ч ажлын үр дүнгээр нь нэмэгдүүлнэ гэж бүрхэг асуудал ярьж байгааг эсэргүүцэж байна.

Тодорхой эх үүсвэрийг бий болгохгүй бол он гараад цалин, хөлсний асуудал яригдана. Энэ үед хөдөлмөрийн маргаан хаа сайгүй эхэлнэ. Тиймээс УИХ, Засгийн газарт аливаа асуудлыг хэрүүл маргаан, жагсаал цуглаантайгаар шийдэхгүйн тулд урьдчилж хөрөнгийн эх үүсвэрийг хэрхэн нэмэгдүүлэх талаар тусгах шаардлагыг тавьж байна.

Хоёрдугаарт, Хөдөлмөрийн аюудгүй байдал, эрүүл ахуйн тухай хуулийн 26.2 дахь заалтыг олон жил ярьж байгаа. Энд тодорхой хөрөнгө мөнгө зарж байж хүний амь нас, эрүүл мэнд, үйлдвэрийн хэвийн үйл ажиллагааг хангана. Гэвч олон жил улсын төсөвт суухгүй байгаагаас үйлдвэрлэлийн осол буурахгүй байна” гэлээ.