Засгийн газрын хуралдаанаас гарсан шийдвэрийн талаар БШУ-ны сайд Л.Энх-Амгалан мэдээлэл өглөө. Тодруулбал, Ерөнхий сайд Л.Оюун-Эрдэнэ зарим их, дээд сургуулийг орон нутаг руу шилжүүлэх асуудлыг БШУ-ны сайдад даалгажээ.  

Тэрбээр энэ талаар "Улаанбаатар хотоос их, дээд сургуулийн зарим салбар сургуулийг орон нутаг руу шилжүүлэх тогтоол гаргаж байсан ч тодорхой үр дүнд хүрч чадаагүй. Өнөөдөр улсын хэмжээнд 88 их, дээд сургууль бий. Үүнд 150 мянган орчим оюутан суралцаж байна. Үүний 143 мянга нь Улаанбаатарт, харин дөнгөж долоон хувь нь орон нутагт сурч байна. 

Хот, хөдөөгийн боловсролын ялгаа бүх түвшинд бий болсон.

Тиймээс орон нутагт их, дээд сургуулийг шилжүүлснээр орон нутагт чанартай боловсрол эзэмших боломж бий болох юм. Ингэхдээ хоосон талд сургууль барихгүй. Эрдэнэт, Дархан, Өмнөговь аймагт байгаа барилга байгууламжийг өргөтгөл хийх замаар байгуулах юм.

Цаашид орон нутагт байгуулах сургалт, судалгааны төвийг МСҮТ, коллеж, их, дээд сургуулийн төрөлжсөн хэлбэрээр зохион байгуулна. Тодруулбал, Өмнөгөовь аймагт уул уурхайн сургууь байгуулна. 

Харин Дарханд Хөдөө аж ахуйн сургуулийг өргөтгөнө. Эрдэнэтэд ШУТИС, МУИС-ийн зарим сургуулийг үе шаттай байгуулна. Орон нутагт сурч байгаа оюутнуудад хөнгөлөлттэй тэтгэлэг, зээл олгоно. Төгсөөд ажлын байраар хангана. Мөн хөдөө орон нутагт ажиллах багш нарт хөдөөгийн нэмэгдэл, орон сууцны зээлд хамруулахаас гадна Улаанбаатарын багшийн цалинтай ижил хэмжээний цалин олгохоор болсон" гэлээ.

Б.Лхам