Монгол Улсын 2022 оны төсвийн тухай хуулийн төсөлд Засгийн газрын бүтцэд Эдийн засаг, хөгжлийн яам, Цахим хөгжил, харилцаа холбооны яамыг байгуулах төсвийг тусгасан. Уг асуудлаар УИХ-аар хэлэлцэж байна.

Энэ үеэр Б.Пүрэвдорж гишүүн үг хэллээ. Тэрбээр “Эдийн засаг, хөгжлийн яам байгуулахыг дэмжиж байгаа. Төсвийн хүрээнд томоохон бүтээн байгуулалт хийх боломж байгаа юу. Үүнийг хийхийн тулд энэ яам үр бүтээлтй ажиллах шаардлага гарч байгаа. Эхний ээлжинд төрийн данхайсан бүтцийг багасгах, төрийн алба хаагчдын тоог багасгах ажлыг хийх ёстой.

Үүнээс хэмнэсэн мөнгөөр гурван томоохон бүтээн байгуулалтын ажлыг төсвөөрөө дамжуулан хийх шаардлагатай байна.

Тухайлбал, эрчим хүчний найдвартай эх үүсвэрийг гаргахад нэг тэрбум ам.доллар гаргах, нефьт, гангийн үйлдвэр бий болгох нь чухал байна. Ийм бүтээн байгуулалтын ажлуудыг яам оруулж ирнэ гэвэл хоёр гараа өргөөд дэмжинэ. Энэ яамны сайдыг бяртайхан шиг улстөрч удирдах ёстой гэдэг дээр Ц.Нямдорж сайдтай санал нэг байна. Намдаа нэлээд бяртай буюу ерөнхий сайд, дарга хийж байсан хүмүүсийг сайдаар тавибал энэ яам сайн ажиллана” гэлээ.

А.Сүх