Төрийн албаны тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэж байна.

Н.Учрал: Төрийн албаны босгыг өндөрсгөж, шаардлага тавьж байгаа зарчмыг хүндэтгэж байна. Гэхдээ ял шийтгэл эдэлж байгаагүй тодорхойлолтыг цагдаагийн байгууллага өгдөг. Гэтэл аливаа гаж зуршилгүй байна гэдэгт юуг тооцох вэ. Хамрын тамхи татдаг дэд сайд нар гаж зуршилтайд тооцогдох юм байна. Энэ хуулиар бол. Тэгэхээр гаж зуршил гэдгийг чинь тодорхойлох бололцоо байхгүй байна. Дээрх нь шударга ёсыг эрхэмлэнэ гэж байгааг яаж хэмжих юм. Хүний эрхийг дээдэлнэ гэдгийг юугаар дэмжих юм. хурал цуглаанд орсноор нь юм уу, эсвэл хүний эрхийн чиглэлээр магистртай гэдгээр нь хэмжих юм уу. Ийм ойлгомжгүй байдал бий болох тусам ялгаварлан гадуурхалт бий болно.

Г.Тэмүүлэн: Өнгөрсөн зунаас эхлээд төрийн албан хаагчийн ёс зүйтэй холбогдуулан Төрийн албан хаагчийн ёс зүйн сахилгын тухай хуулийг УИХ-аас боловсруулж байгаа. Төрийн албаны тухай хуульд нэмэлт, өөрчлөлт оруулах тухай хуулийн төслийг өнгөрсөн хавар УИХ-д өргөн барьсан. Түүнээс хойш УИХ үүнтэй холбогдуулж Ёс зүйн сахилгын тухай хуулийг хийж байна. Таны хэлсэн шударга ёс гэдэг юм уу энэ асуудал Засгийн газрын 2019 оны нэгдүгээр сарын 13-ны 33 дугаар тогтоолоор баталсан Төрийн захиргааны болон үйлчилгээний албан хаагчийн ёс зүйн дүрмийн хүрээнд тусгагдсан заалт юм. Эдгээр асуудлууд яагаад зөвхөн төрийн жинхэнэ албан хаагчдад үйлчлээд төрийн улс төрийн албан хаагчдад үйлчлэхгүй байгаа юм гэдэг асуудал. Тиймээс ялгаварлалгүйгээр хуульчлах шаардлагатай гэж үзэж байна.