УИХ-ын гишүүн асан Л.Гүндалай сонгуульд өрсөлдөөд ялагдсаныхаа дараа гэртээ ажилгүй сууж байгаа гэнэ. Тэрээр хүүхдүүдээ сургуульд нь хүргэж өгч тарахаар авдаг ажилтай болжээ. Өдрийн ихэнх цагийг гэр бүлийнхэнтэйгээ өнгөрөөж, спортоор хичээллэж байгаа бөгөөд нойроо ханатал сайхан унтаж байгаа гэж нэгэн ярилцлагадаа дурджээ. Тэрээр мөн “Хөвсгөлчүүд надаас уйджээ. Хөвсгөлийн ард түмнийг төрд төлөөлж 12 жил суулаа. Тиймээс гомдоод байх юм алга. Хөвсгөлийнхнийг төлөөлж энэ олон жил төрд суухдаа хүүхдийн мөнгөнөөс өөр зүйл үнэндээ санаачилсангүй. Арга ч үгүй байсан даа. Би чинь дандаа намаа ялагдсан үед УИХ-ын гишүүнээр сонгогдож явжээ. Нам маань нэг удаа ялсан чинь би ялагдчих юм. Одоо яахав дээ. Парламентын түүхэнд Хөвсгөлийг төлөөлж бүтэн 12 жил төрд суусан хүн надаас өөр байдаггүй юм билээ. Үүнээс илүү яах билээ. Тэгэхээр хөвсгөл түмэндээ баярлаж байна. Тэд маань намайг улс төрд оруулсан өчнөөн жил дэмжсэн сайхан л байлаа.” гэж баярласан сэтгэлээ илэрхийлсэн байна.