Байгаль дэлхий дээр түмэн зүйлийн амьтад байдгаас хүмүүс багахан хэсгийг нь л мэддэг гэвэл та итгэх үү? Хүн төрөлхтөн хэл, гадаад төрхөөрөө ялгардаг шиг амьтад асар олон зүйлд хуваагддаг. Тэдний заримыг нь хараад "гаж" гэж нэрлэж ч болохоор. Гэхдээ үнэн хэрэгтээ бидний төсөөллөөс гажиж байгаа болохоос байгаль эхийн л нэг бүтээл юм. "Солиотой 24" булангаас бидний нүдээр "гаж" харагдах сонирхолтой амьтадтай танилцъя.
Иодо багш. "Оддын дайн" кинонд гардаг намхан, ногоон, дэлдэн чихтэй амьтныг санагдуулах энэ зураг бол нэгэн зүйлийн сарьсан багваахайн зураг юм. 2010 онд энэ амьтныг Шинэ Гвинейн ширэнгэн ойгоос олжээ. "Иодо багваахай"-г олсон ширэнгэн ойгоос хүн төрөлхтний өмнө нь мэдэж амжаагүй байсан 200 гаруй зүйлийн амьтад олсон гэнэ.
Ногоон Пинокио. Хүүхэлдэйн киноны баатар Пинокио шиг бусдаасаа урт хамартай энэ мэлхийг Австралийн их сургуулийн оюутнууд олжээ. Сонирхолтой нь тэднийг Фожа ууланд аялаж байхад нь хоол хийж байсан газарт нь өөрөө хүрч иржээ. Ногоон "Пинокио" тэдний ууттай цагаан будаа дотор орчихсон байсан гэнэ. Ингээд л бас нэг шинэ зүйлийн амьтныг нээжээ.
Нэг нүдэт. Эртний Грекийн болон Монгол ардын домог үлгэрт духан дээрээ ганц нүдтэй циклопын тухай гардаг. Тэгвэл гүн далайд ийм амьтан бодитоор амьдардаг байх нь.
"Оршуулгын огтоно". 1997 онд модны үсэрхэг хархын нэгэн төрлийг олжээ. Перугийн Мачу Пичугээс холгүй ууланд үсэрхэг, саарал хэрнээ бусад хархаас өөр шүдтэй амьтан амьдарч байна. Сонирхолтой нь энэ хархыг зөвхөн оршуулгын газар болон амьтны сэгийн ойролцоогоос ховор тохиолдлоор олж хардаг гэнэ.
Ноён бөмбөлөг. Эрдэмтдийн "Ноён бөмбөлөг" гэж нэрлэсэн энэ амьтан бол загас. Толгой нь хэтэрхий том хэрнээ хамгийн хэрэгтэй сэлүүр нь өчүүхэн жижиг. Энэ төрлийн загас Атлантын далай, Энэтхэг болон Номхон далайн усанд далайн түвшнөөс доош 100-2800 метрийн гүнд амьдардаг.
Уйтгарт хаан. Өнгөрсөн долоо хоногт Конго улсын ширэнгэн ойгоос шинэ зүйлийн сармагчин олсон тухай эрдэмтэд танилцуулаад байна. Түүнийг нутгийн анчид мэддэг байсан ч шинжлэх ухаанд бүртгэгдээгүй байсан юм. Энэ сармагчинг нутгийнхан Лесула гэж дууддаг. Харин сүүлийн 28 жилийн турш шинэ зүйлийн сармагчинтай нүүр тулаагүй байсан эрдэмтдийн хувьд том нээлт болжээ. Энэ сармагчингийн нүд зовлон үзсэн хүн шиг ямар уйтгартай байгааг харна уу.
Гологдсон "Навчин хамарт": Энэ амьтныг 2008 онд илрүүлсэн ч эрдэмтэд шинэ зүйл гэхээсээ илүү байгалийн гажуудал гэж үзжээ. Сарьсан багваахай яагаад ийм навчин хамартай болсон талаар хэн ч олигтой судлаагүй гэнэ. Учир нь түүнийг "байгаль эхийн алдаа" гэж үзээд орхижээ.
Ягаан луу. Бидний нэрлэж заншин жаран хөлтийн шинэ төрөл. Гэхдээ энэ олон хөлт хорхой тод ягаан өнгөтэй хэрээр үхэлд хүргэх хортой. Түүнээс хортой цианит ялгардаг бөгөөд 2008 онд шинжлэх ухаанд бүртгэгджээ. Байгаль "ягаан луу"-г аюултай гэдгийг бусдад сануулж ийм хурц өнгөтэй болгожээ.
24tsag.mn
Сэтгэгдэл (4)