Нийслэлийн цагдаагийн удирдах газрын Мөрдөн шалгах газраас орон сууц түрээслүүлнэ гэх нэрийдлээр бусдыг залилан мэхэлсэн, онц хэрцгийгээр бусдыг дээрэмдсэн асуудлаар мэдээлэл хийлээ.
Нийслэлийн цагдаагийн удирдах газрын дэд дарга, Мөрдөн шалгах хэлтсийн дарга, цагдаагийн хурандаа Д.Отгонжаргал “Энэ оны эхний есөн сарын байдлаар цагдаагийн байгууллагад 17360 гэмт хэрэг бүртгэгдсэнээс нийслэлд 64,1 хувь буюу 11132 гэмт хэрэг бүртгэгдсэн байна.
Хэргийг задалбал, Эрүүгийн хуулийн 12.1.4-д заасан бага насны хүүхдийн эсрэг үйлдэгдэж буй гэмт хэрэг 63 хэрэг бүртгэгдсэнээс 35-д нь эрүүгийн хэрэг үүсгэж яллагдагчаар татсан. Хэргийн илрүүлэлт 55 хувьтай байна. Үлдсэн 28-д нь хэрэг бүртгэлтийн ажил явагдаж байна. Эдгээр 63 хэргийн үйлдэгчдийн судалгааг авч үзэхэд 28 нь хамаатан садан, хойд эцэг, ах дүүс, гэр бүлийн хамаарал бүхий этгээдүүд байна.
Түүнчлэн дээрэмдэх гэмт хэрэг оны эхний 10 сарын байдлаар 210 хэрэг бүртгэгдсэн. Үүнээс 110 хэргийг илрүүлж, хэргийн илрүүлэлт 59,6 хувьтай, өнгөрсөн оны мөн үеэс 6,5 хувиар өссөн байна. 79 хувь нь шөнийн цагаар бүртгэгдэж байна. Хохирогчдын 58,4 хувь нь согтуурсан буюу мансуурсан үедээ гудамж талбайд ганцаараа явж байхдаа халдлагад өртжээ. Уг хэрэгт холбогдсон хүмүүсийн 46 хувь нь 18-23 насны залуучууд эзэлж байна” гэлээ.
А.Сүх
