УИХ-ын гишүүн Д.Ганбатаас тодрууллаа.

-Засгийн газар байр сууриа бататгахын тулд гишүүдэд тойрогтоо зарцуулах дөрвөн тэрбум хуваарилж байна гэдэг шүүмжлэл гараад байна?

-Хувь гишүүнийхээ зүгээс эсрэг байр суурьтай байгаа. Хуульчилсан авлига, лобби ч гэх үү ийм байж болохгүй. Монгол Улсын төсөв хуулийнхаа дагуу нэгдсэн байх ёстой. Хэн нэгэн гишүүдэд зохицуулж болохгүй. Засгийн газар улс орныхоо асуудлыг нэгдсэн журмаар шийдэж, хөгжүүлж байх ёстой. Хуулийн цоорхойг ашиглаж битгий ийм зүйл хийгээсэй. Төсөв гэдэг утгандаа нийцүүлж батлах, татвар төлөгчдийн мөнгийг хэрэгтэй зүйлд нь зарцуулах ёстой гэж үзэж байна.

-Хэнтий аймагт хоёр нисэх онгоцны буудал бүтээн байгуулахаар төсөвлөгдсөн байна. Аймгуудад тусгагдсан хөрөнгө оруулалтуудын ялгаатай байдлыг та юу гэж дүгнэж байна вэ?

-Ирэх оны төсөвт шаардлагатай хөрөнгө оруулалтуудыг эрэмбэлэх ёстой. Энэ шаардлагын хэмжээнд хүрэхгүй байна. Тухайлбал, Хэнтий аймагт хоёр нисэх онгоцны буудал барихаар төсөвлөгдсөн байна. Хэнтий аймагт төсвийн хөрөнгө оруулалтын 10 гаруй хувь нь тусгагдсан гэж ярьж байгаа. Уг нь үүнээс өөр шийдэх ёстой олон асуудал бий. Гэвч төсвийн үр ашигтай зарцуулалт, оновчтой эрэмбэлэлт харагдахгүй байна.

-Засгийн газраас мөн л алдагдалтай төсөв оруулж ирсэн. Төсвийн алдагдлыг нөхөх ямар боломж байна гэж харж байна вэ?

-Сүүлийн жилүүдэд дан алдагдалтай төсөв баталж байна. Бондоор нөхөх яриа бий. Ингэснээр иргэдийн зээл авах боломж зэрэг бүх л зүйлд хүндрэл үүснэ. Өр нэмэгдэх тусам татвар төлөгчид, иргэд л төлж таарна шүү дээ.

-Засгийн газрын өрийн хэмжээ хэтэрсэн, нөхцөл байдал хүнд байгаа энэ цаг үед төсвийг илүү танах боломж байсан уу?

-Бүрэн боломжтой. Төсвөө татаж аваад дахиад нягтлах, эсвэл хэлэлцүүлгийн явцад сайжруулах ёстой. Гишүүдийн тойрогт зарцуулах 4 тэрбум, нисэх онгоцны буудал ч гэдэг юм уу. Үргүй зардлыг бууруулах боломж бий. Дэлхий нийтэд цар тахал дэгдсэн, хүнд хэцүү үед нисэх онгоцны буудал ямар хэрэгтэй юм. Эрүүл мэндийн салбар хэрхэн ажиллаж байна. Гэтэл яам, тамгын газар ямар тансаг байгаа билээ.

-Та тойрогтоо хөрөнгө оруулалтын ямар санал өгсөн бэ?

-Аль болох иргэдээ дэмжих, ажлын байр бий болгох санал өгсөн.

-Засгийн газар Оюутолгойн хөрөнгө оруулагч талтай хэлэлцээр хийж байгаа. Уг хэлэлцээр дээр ямар байр суурьтай байгаа вэ?

-Анхааралтай ажиглаж байгаа. Засгийн газрыг ажиллах боломжоор хангах ёстой. Үр дүнг нь харъя.

-Нийгмийн бодлогын байнгын хорооны хуралдаанаар зарим гишүүдээс ковид-19 халдвараар өвчлөөгүй иргэдэд зориулж нэг удаагийн тусламж олгох санал гарч байсан. Хэрэв энэ талаар хэлэлцвэл та дэмжих үү?

-Халдвар аваад эмчлүүлсэн иргэддээ илүү нөхөн олговор олгох ёстой гэж бодож байна. Өвчнийх нь суурь нь үлдэж байна гээд байгаа шүү дээ. Тиймээс үр дагаврыг нь арилгах, тухайн иргэн, гэр бүлийн сэтгэл санааны хохирлыг арилгахын тулд Засгийн газар анхаарах ёстой. Ковид-оор өвчлөөгүй биш өвчилсөн иргэддээ л анхаарал тавих нь зөв байх. Үүнийг төсвийн мөнгөөр хийж болохгүй. Даатгал эсвэл тусламжаар шийдэх ёстой. Ийм нөөц боломжийг эрэлхийлэх хэрэгтэй гэж үзэж байна.

Б.Лхам