Оюутолгойн хөрөнгө оруулалтын гэрээнд өөрчлөлт оруулах Засгийн газраас байгуулагдсан ажлын хэсэг өнөөдөр хөрөнгө оруулагч талтай хэлэлцээрийн ширээний ард дахин сууна. Уг асуудалд гишүүд Рио-Тинтогоос хүргүүлсэн Монголын талын 34 хувийн өрийн 70 хувийг тэглэх саналыг хүлээн авахгүй боломжгүй гэдэгт санал нэгдэж байгаа юм. 

УИХ-ын гишүүн С.Ганбаатар "400 тэрбум ам.долларын Монголын баялгийг аваад буцаагаад гарч ирэх ашгийн 34 хувийг хүүтэйгээр Монголчуудад хүүлсэн. Энэ хэмжээний баялгаа бусдад өгөөд хариуд нь 2051 он хүртэл ногдол ашиг авахгүй. Өрөнд өрнө. Өр нь цаашид ч өсөх ийм нөхцөл байдал дээр 1.6 тэрбум ам.долларыг чинь харж үзэж өршөөе гэсэн бичиг ирүүлсэн. 

Өөрөөр хэлбэл, 34 хувьд ногдох хүү, өр өнөөдөр 2.3 тэрбум ам.доллар болсон. 1.6 тэрбум ам.долларт нь өршөөл үзүүлье гэдэг нь энэ мөнгөний 70 хувь юм.

Мөн 700 сая ам.доллараа хурдан төл. Цаашид хүүлсэн хэвээр байхыг хүлээн зөвшөөр гэсэн бичиг орж ирсэн. Энэ нь нэг талаар сайн талтай. Тухайлбал, 22 тэрбум ам.доллараа авна гэж дайрдаг байсан хүмүүс ядаж 70 хувиар "Бид арай дэндүү луйвар хийсэн байна" гэдгээ хүлээн зөвшөөрсөн явдал юм. Хоёрдугаарт, миний зүгээс анхнаасаа хөрөнгө оруулалтын гэрээг өөрчилж Монголд ашигтай болгох байр суурь хэвээрээ байгаа. Луйврын хөрөнгө оруулалтын гэрээтэй мөртлөө үүнээс үүдсэн луйврын өр төлбөрөөс өршөөл гуйдаг ард түмэн бид биш.

Захиан дээрээ тэд та нар ядарч байгаа, өлсөж, зовж, ажилгүй байгаа. Та нарт 1 их наядын тусламжийг өгье. Гэхдээ гэрээгээ өөрчлөхгүй шүү гэсэн. 

Энэ бол байж болшгүй зүйл. Рио-Тинтогийн эзэд ээ, Монголчууд баялгийн эзэд. Баялгийг хамтарч эзэмшиж байгаагаас бид гуйлга гуйдаг улс биш. Та нарын харж үзэж байгаа зүйл хэрэггүй. Харин шударга бизнесийн зарчимтай байхыг шаарддаг" гэлээ. 

А.Сүх