“Эрдэнэс Тавантолгой” ХК-ийн гүйцэтгэх захирал Б.Ганхуягийг хэвлэл мэдээлэл, олон нийтийн сүлжээгээр “нүдэх” шаардлага хэсэг бүлэг хүмүүст гарсан бололтой. Ёстой л муулж болох хамгийн муу үгсийг түүнд зориулж, улстөржүүлж өндрийг нь авахуулах гэсэн кампаничилсан тоглолт ид өрнөж байна. “Эрдэнэс Тавантолгой”-н Б.Ганхуягтай холбоотой ноцтой баримтыг дэлгэж байна” л гэнэ, “Б.Ганхуягийн эсрэг ШӨХТГ-ын дарга Б.Бат-Эрдэнэ бослоо, браво” л гэнэ, “Эрдэнэс Тавантолгой” ХК-ийн удирдлагууд муудалцаж эхэлжээ” л гэнэ... Хэн ингэж улайрна вэ.

Хэвлэл мэдээлэл хийгээд олон нийтийн сүлжээгээр төлбөртэй мэдээлэл тасралтгүй явуулж байгаагийн цаана хэний ашиг сонирхол байна вэ. Эрдэнэсээр овоглосон компанийг чухам хэн ийнхүү онилов... “Эрдэнэс Тавантолгой” ХК болон өөрийнх нь эсрэг өдөр, шөнөгүй дайралт хийх “Нууц эзэд”-д Б.Ганхуяг хатуухан хариу өгчээ. Тэр дундаа “Эрдэнэс Тавантолгой”-н удирдлагууд муудалцаж эхэлжээ. Аргагүй шүү дээ, нэгэндээ мэдэгдэхгүйгээр их наядын тендерийн шалгаруулалтыг хууль зөрчин хийчихсэн байхад алалцахгүй гээд яах вэ” гэх мэдээллийг “Арай эрт яарч хийсэн дүгнэлт байна. Наад тендер чинь дуусаагүй. Хэн ч гэрээ байгуулаагүй байгаа шүү. Хуулийн хугацаандаа хянагдаж байна. Ер нь хятадууд хэзээнээсээ монголчуудыг хооронд нь хэрэлдүүлж, яс хаяж алалцуулж байсан түүхийн нэг хэсэг нь энэ.

Хоёр хятад компани нөгөөхөө унагахын тулд мөнгөнд дуртай, худалдагдах боломжтой хүмүүст төлбөр төлж, харлуулж байгаа ажил. Монгол бол тусгаар улс. Өөрийн гэсэн хуультай. Хуульд аливаа тендерт оролцогчдын тухайн үед ирүүлсэн материалыг үнэлдэг. Хэрэв олон улсын тендер бол тухайн оролцогч компанийнх нь харъяалах улсын төрийн албан ёсны бүртгэлийн байгууллагын баталгааг үндэслэж шийдвэр гаргадаг. Түүнээс биш “Интернэт хөгжсөн” гээд сайтын мэдээллийг “Албан ёсных” гэж аваад шийдвэр гаргах үндэслэл хуульд байхгүй” хэмээн эрс няцаажээ.