Оюутолгойн хөрөнгө оруулалтын гэрээг сайжруулахаар Засгийн газраас байгуулагдсан ажлын хэсэг хөрөнгө оруулагч талтай хэлэлцээрийн ширээний ард сууж буй. Өчигдөр Ерөнхий сайд асан Ч.Сайханбилэг Оюутолгойн гэрээтэй холбоотойгоор цахим хуудсаараа дамжуулан мэдээлэл өгсөн. Энэ тухай ажлын хэсгийн ахлагч, ХЗДХ-ийн сайд Х.Нямбаатар мэдээлэл өглөө.

Тэрбээр “Засгийн газрын Оюутолгойн хөрөнгө оруулалтын гэрээг сайжруулахад ямарваа нэгэн гаднын компанийн нөлөөнд автахгүй, тулгалт шаардлагад орохгүй байх талаар анхаарч ажиллаж байгаа. УИХ-ын 92, 40, 57 дугаар тогтоолоор хөрөнгө оруулалтын гэрээг сайжруулах олон чиглэлий УИХ-аас өгсөн.

Цаашид хөрөнгө оруулалтын гэрээг сайжруулж, үр өгөөжийг нэмэгдүүлэх бодит алхмыг хөрөнгө оруулагч тал хүлээж авахгүйгээр хэлэлцээр цаашид үргэлжлэхгүй.

Хөрөнгө оруулагч тал тодорхой зүйлийг албан захидлаар болон хэвлэлээр гаргахыг зөвшөөрсөн. Юу гэвэл, цаашид энэ хэвээр явбал Монголчууд 22 тэрбум ам.долларын өртэй, ухсан нүхтэй үлдэнэ гэдгийг маш тодорхой хэлсэн. Бид ирэх долоо хоногт мөн адил хэлэлцээрийг үргэлжилнэ. Нарийн зүйлүүдийг ярьж болохгүй байна. Алхам алмаар асуудлыг ээлж дараалан шийднэ.

Ерөнхий сайд асан Ч.Сайханбилэгийг интерполоор үргэлжлүүлэн хайж байгаа. Бүхэл бүтэн Монгол Улсын Ерөнхий сайдаар ажиллаж байсан хүний хувьд заавал асуудал үүсгэлгүй өөртөө итгэлтэй байгаа бол хууль шүүхээр асуудлаа шийдүүлээд нэг тийш нь болгох зүйтэй гэж үзэж байна.

Түүнийг АТГ-аас яллагдагчаар татан шалгаж байгаа гэсэн.

Хэрэг нээх үед гадагшаа яваад эргэж ирээгүй. Хөрөнгө оруулалтын гэрээг магтаад байгаа хүмүүст хандаж хэлэхэд Монгол Улс 22 тэрбум ам.долларын өрөнд орохоор байгааг Рио-Тинто хэлж байна.

Ер нь Оюутолгойн гэрээг сайжруулахаар хэлэлцээр хийхээр бэлдэх бүрд Ерөнхийлөгч асан Ц.Элдбэгдорж, Ч.Сайханбилэг нар жагсаал хийдэг. Үймээн самуун, жагсаал бүрийн ард байж байдаг. Засгийн газрыг тогтворгүй байлгах, үймээн самуун зохион явуулж ямар улсын захиалгыг биелүүлээд байгааг ойлгохгүй байна" гэлээ.

Б.Лхам