Намрын чуулганы хамгийн түрүүнд хэлэлцдэг хуулийн төсөл бол ирэх оны Төсвийн тухай хуулийн төсөл байдаг. Арваннэгдүгээр сарын 15-ны дотор хэлэлцэн батлах ёстой байдгийн дагуу 2022 оны төсвийн тухай хуулийн төслийг УИХ энэ долоо хоногт үргэлжлүүлэн хэлэлцэнэ. Энэ удаагийн Төсвийн тухай хуулийн төсөлд Монгол Улсад хүчин төгөлдөр мөрдөгдөж байгаа хуулийг илт зөрчсөн нэгэн заалт орсон байгаа нь Ирээдүйн өв санд хуримтлагдаж байгаа мөнгөн хөрөнгийг зарцуулах тухай заалт. Одоогоор тус санд хоёр их наяд төгрөг хуримтлагдаад байгаа бөгөөд энэ нь оны эцэс гэхэд 2.6 их наяд төгрөгт хүрнэ гэсэн тооцоолол байгаа. Гэтэл 2030 он хүртэл зарцуулж болохгүйгээр хуульчилсан уг сангийн мөнгийг ирэх онд Хүүхдийн мөнгө болгон тараахаар Засгийн газар, Сангийн сайд Б.Жавхлан төсөл боловсруулаад УИХ-аар хэлэлцэж байгаа юм.  

Уг нь энэ санг анх байгуулахдаа макроэдийн засгийн сорилтуудыг шийдвэрлэх, мөнгийг эдийн засгийн гадна “зогсоолд тавих” замаар Голланд өвчнөөс сэргийлэх, өнөө үеэс хойч үедээ санхүүгийн актив шилжүүлэх зэрэг шаардлагад нийцүүлж байв. Байгалийн баялагтай бусад хөгжингүй орнууд байгалийн баялаг нь өнөө үеийнхэн төдийгүй ирээдүй хойч үеийнхий ч баялаг гэж үздэг учраас төсвөөс гадуур сан үүсгэн ирээдүй үедээ хадгалдаг. Манай улсын Ирээдүйн өв сан ч мөн ийм зорилгоор байгуулагдсан бөгөөд 2030 он хүртэл эхний ээлжинд хуримтлал үүсгэхээр хууль дүрэмд тусгаад байлаа. Бусад улс орны Үндэсний баялгийн сан лугаа үйл ажиллагаа явуулна, шавхагдаад дуусах байгалийн баялгаас хойч үедээ актив болгон хадгална гэсэн үндсэн зорилготой байсан эл сангийн хөрөнгө Ч.Хүрэлбаатар Сангийн сайдын үед 1.5 их наяд төгрөгт хүрээл байв. Энэ оны эцэс гэхэд энэ хуримтлал 2.6 их наяд болно хэмээн тооцож байсан ч Сангийн сайд Б.Жавхлан Ирээдүйн өв сангийн хуримтлалд гар дүрэн нийгмийн халамжийг санхүүжүүлэхээр болсон байна. Уг нь энэ хуримтлалын бас нэгэн гол зорилго нь байгалийн баялгаас олсон мөнгийг поп улстөрчид нийгмийн хавтгайрсан халамжид цацан өөрсдөдөө нэр хүнд наахын эсрэг байсан юм шүү дээ. Харамсалтай нь Б.Жавхлан сайд ирээдүйн иргэдэдээ хадгалж байсан хоёр их наяд төгрөгийг ирэх онд зарцуулж дуусгахаар ханцуй шамлан айсуй.

Б.Жаргал