Ерөнхий сайд Л.Оюун-Эрдэнийн өчигдөр хийсэн мэдээллээс анхаарал татсан нэгэн зүйл нь төрийн өмчит томоохон компаниудыг ирэх жил “Эрдэнэс Монгол”-д нэгтгэх тухай байлаа. Тэрбээр, ““Тавантолгой”, “Эрдэнэт”, “Монголросцветмет”, цахилгаан станцууд зэрэг төрийн өмчит компаниуд бий. Эдгээрийн зарим нь Төрийн өмчийн бодлого зохицуулалтын газар, зарим нь Уул уурхай, хүнд үйлдвэрийн яаманд харьяалагддаг. Тэгвэл эдгээр компаниудыг бүгдийг нь “Эрдэнэс Монгол” дээр нэгтгэнэ. “Эрдэнэс Монгол”-ын менежмент болон ТУЗ-ийн асуудлыг ирэх жил багтаан шийднэ. Нэг үгээр хэлбэл, Зэсийн группийн захирал бөгөөд “Эрдэнэс Монгол”-ын захирал гэдэг л орон тоо байна. “Тавантолгой”, “Эрдэнэт” тус бүрдээ ТУЗ-тэй, түүнд нь төрийн албан хаагчид ордог, хоорондоо уялддаггүй асуудлыг ирэх жил төсвийн реформын хүрээнд цэгцэлнэ. Мөн ашиггүй төрийн өмчит үйлдвэрийн газруудыг татан буулгана. Дээрээс нь ашигтай бол гэрээ сунгадаг, ашиггүй бол цуцалдаг энгийн зарчим руу орох ёстой. Ашигтай ажиллахын тулд хэдэн орон тоотой байх вэ гэдэг нь тухайн менежерийн шийдэх ёстой асуудал байдаг болно” хэмээн мэдэгдсэн.

Ерөнхий сайдын энэ мэдээлэл “Эрдэнэс Монгол”-ыг олны анхаарлын төвд авчрав. “Эрдэнэс Монгол” компанийн гүйцэтгэх захирал Д.Хаянхярваа нь бусдаас авилга авсан байж болзошгүй гэдэг үндэслэлээр Ганц худагт саатуулагдаж байгаа. Нэг ёсондоо “Эрдэнэс Монгол” одоогоор “эзэн”-гүй байна. Ийм үед Ерөнхий сайд төрийн өмчит томоохон компаниудыг “Эрдэнэс Монгол”-д нэгтгэнэ гэж хэлсэн нь энэ компанийн удирдлагыг өөрчлөх нь ээ гэсэн мессэжийг өгч буй хэрэг юм. Хэрвээ Ерөнхий сайдын хийсэн мэдээлэл заасан хугацаандаа ажил хэрэг болвол “Эрдэнэс Монгол”-ын дарга болох марафон нэлээд ширүүхэн болж мэдэх л юм.

Б.Жаргал