Байгаль орчин, аялал жуулчлалын яам хоёр хоногийн өмнө хоёр тендер зарлажээ. Нэг нь Temple stay Mongolia Монголын Буддын шашны зан үйл, ТЭЗҮ (Тенхик эдийн засгийн үндэслэл) боловсруулах хэрэгжүүлэх гэсэн нэртэй 150 сая төгрөгийн тендер. Нөгөө нь Монгол туургатнуудад зориулсан “Чингис хааны тахилга” тайллагыг шашин, соёл, аялал жуулчлалын эвентийг хөгжүүлэх, урьдчилсан ТЭЗҮ нэртэй, 140 сая төгрөгийн тендер. Энэ тендерийн материалыг хүлээн авах хугацаа нь энэ сарын найман бөгөөд нийтдээ 290 сая төгрөгийн хоёр тендерийг БОАЖЯ найман хоногийн хугацаанд зарласан гэсэн үг. Байгаль орчин, аялал жуулчлалын яамнаас зарласан тендерийн зараас үүдэн Байгаль орчин, аялал жуулчлалын сайд Н.Уртнасангаас асуух хоёр байна.

-Нэгдүгээрт, эдийн засаг элгээрээ хэвтэж байгаа энэ үед 290 сая төгрөгөөр тахилга, тайллага  хийх ТЭЗҮ боловсруулах нь эрүүл үзэгдэл үү?

-Хоёрдугаарт, тахилга тайллагын эвентийг хөгжүүлэх ТЭЗҮ гэж ямар юм байдгийг тайлбарлана уу?

Жич:Монгол хэлийн журамласан үгийн толиос харахад БОАЖЯ-ны зарласан тендерт орсон “Тайллага” гэдэг үг нь “Төрөл аймгаар ангилж, ялган тэмдэглэсэн бичиг” ажээ. Харин онгон шүтээн, уул усны тахилгыг “Тайлга” хэмээдэг билээ.

О.Балдан-Очир