УИХ дахь Эдийн засгийн байнгын хороо Жолоочийн хариуцлагын даатгалын тухай хуулийн шинэчилсэн найруулгын төслийн хэлэлцэх эсэхийг хэлэлцэж байна.

Улсын их хурлын гишүүн Т.Аюурсайхан: "Ашгийн төлөө байгууллагад жолоочийн хариуцлагын албан журмын даатгалын тусгай зөвшөөрлийг олгосон. Ашгийн төлөө байгууллага үүнийг эрхэлснээр хуулийн үндсэн зорилго хэрэгжихэд хүндрэл үүссэн. Албан журмын бусад даатгалыг ашгийн бус этгээд эрхэлдэг. Олон улсын жишиг ийм байдаг.  Энэ хуулийн үндсэн зорилго нь жолоочийн хохирол барагдуулах, эрх ашгийг хамгаалах. Ашиг олох зорилгоор энэ хууль гажуудахад хүрсэн гэж хууль санаачлагчид үзэж байгаа. Монгол Улсын Их Хурлын 12 дугаар тогтоолоор жолоочийн хариуцлагын даатгалын үйл ажиллагаанд оролцогч талуудын эрх үүргийг тодорхой болгох, албан журмын даатгагчдын холбооны чиг үүрэг, зохион байгуулалтын тодорхойгүй байдлыг арилгах, даатгуулагч, хохирогч нөхөн төлбөрийг нэхэмжлэл гаргахад хохирол үнэлэгч заавал оролцох шаардлагыг хасаж, холбогдох авто засвар, үйлчилгээ болон эрүүл мэндийн байгууллага оролцох боломжийг бүрдүүлэх, даатгагч даатгуулагчийн үүргийг ойлгомжтой болгох, даатгалын үнэлгээний хэмжээ, тооцоолох аргачлал, итгэлзүүрийг шинэчлэх зорилт дэвшүүлсэн. Түүнчлэн 2019 онд Засгийн газраас “Замын хөдөлгөөний аюулгүй байдлыг хангах үндэсний хөтөлбөр” баталсан. Энэ хөтөлбөрөөр гарч буй ослыг 50 хувиар бууруулах зорилт тавьсан юм. Монгол улсад жилд зам тээврийн 30 мянган осол болж байна. Үүний улмаас 500 орчим хүн амь насаа алдаж, 1000 орчим хүн тахир дутуу болж байна. Төрийн бодлогын баримт бичиг, зам тээврийн салбарын бодлоготой жолоочийн хариуцлагын даатгал уялдаж явдаг жишиг олон улсад бий. 

Манай улсад хуулийн үндсэн зарчим ийм байтал ашгийн төлөө байгууллага жолоочийн хариуцлагын даатгалыг хариуцсанаар зам тээврийн бодлого орхигдож иржээ. Тухайлбал, Жолоочийн хариуцлагын даатгалын тухай хуулийн 16.1-т зааснаар даатгагч үнэлээчийг томилно гэж заасан байдаг. Гэвч үнэлгээг багаар тооцохыг урьтал болгодог. Түүнчлэн нөхөн төлбөрийг үндэслэлгүйгээр олгохгүй байх асуудал гаргадаг. Мөн тухайн автомашиныг жолоодож байгаа хүн бүрийг даатгалд хамрагдсан байхыг шаарддаг учраас давхардуулан даатгалын мөнгө авдаг асуудал бий. Цагдаагийн тодорхойлолт заавал шаарддагаас болж зөрчлийн оноо хасах, торгох байдлаар асуудалд ханддаг. Ингэхээр даатгуулагчид захиргааны арга хэмжээ авахуулахгүйн тулд хувиасаа зардлыг гаргаж даатгалын төлбөр аж ахуй эрхлэгчийн ашиг болдог тохиолдол нийтлэг байна. Энэ хуульд жолооч хэмээх тодорхойлолтыг өргөн утгаар томъёолсон. Хууль батлагдсанаар төрийн оролцоогүй, ашгийн бус нийтийн эрх зүйн хуулийн этгээд энэ асуудлыг эрхлэнэ. Мөн хохирлыг бодитой үнэлдэг, бүрэн гүйцэт олгодог болно. Даатгалын тухай хууль хэрэгжсэн есөн жилийн хугацаанд нийт 231 мянган хүнд 121.9 тэрбум төгрөгийн нөхөн олговор олгосон бол, нийт сая гаруй жолоочоос 230.5 тэрбум төгрөгийн хураамж төвлөрүүлжээ".